काठमाडौं। जुम्लाको पातारासी गाउँपालिका-५ का वडाध्यक्ष दत्तबहादुर बुढा बलात्कार आरोपमा पक्राउ परेका छन्।

जिल्ला प्रहरी कार्यालय जुम्लाका अनुसार २८ वर्षीया महिलाको उजुरीका आधारमा उनलाई बुधबार पक्राउ पुर्जी जारी गरी नियन्त्रणमा लिइएको हो।

प्रहरी नायब उपरीक्षक रवीनबाबु रेग्मीका अनुसार घटनासम्बन्धी थप अनुसन्धानका लागि अदालतबाट पाँच दिनको म्याद थप गरिएको छ।

पीडित महिलाले बुढाले पटक-पटक धम्क्याउँदै आफूलाई बलात्कार गरेको भन्दै जाहेरी दिएकी थिइन्। वडाध्यक्ष बुढा नेपाली कांग्रेसबाट निर्वाचित जनप्रतिनिधि हुन्।

घटनाबारे थप अनुसन्धान जारी रहेको जिल्ला प्रहरी कार्यालय जुम्लाले जनाएको छ।