काठमाडौं। राष्ट्रिय स्वतन्त्र पार्टी (रास्वपा) का सांसद यज्ञमणि न्यौपानेले नेपाल बार एशोसिएशनले थालेको लाल्टिन आन्दोलनप्रति तीव्र असन्तुष्टि जनाएका छन् ।

सामाजिक सञ्जालमार्फत उनले बारको नेतृत्व र आन्दोलनको औचित्यमाथि प्रश्न उठाउँदै व्यङ्ग्य गरेका हुन् ।

न्यौपानेले नवोदित कानुन व्यवसायीका समस्या, गरिब तथा असहाय नागरिकले न्याय नपाउँदा बार मौन बसेको आरोप लगाए । उनले न्याय सम्पादनमा विचलन आउँदा, विवादास्पद फैसला हुँदा र भ्रष्टाचारका मुद्दा तामेलीमा जाँदा पनि बार नेतृत्व मौन रहेको टिप्पणी गरेका छन् ।

उनले राजनीतिक भागबन्डामा न्यायाधीश नियुक्ति हुँदा, कर्मचारीतन्त्रमा राजनीति हुँदा र पहुँचका आधारमा फैसला भएको चर्चा चल्दा पनि बारले आवाज नउठाएको उल्लेख गरे । अहिले भने लाल्टिन बोकेर आन्दोलनमा उत्रिनुलाई उनले ‘नाटक’को संज्ञा दिएका छन् ।

न्यौपानेले लेखेका छन्, ‘घर जलिसकेपछि धुवाँ देखेर बाल्टिन बोकी हिरो बन्न निस्किएको जस्तो शैली अहिले देखिएको छ ।’

उनले न्यायका नाममा राजनीति नगर्न आग्रह गर्दै लाल्टिन बाल्नै परे गरिबले न्याय नपाएको मुद्दामा, ढिलो न्यायका कारण जीवन प्रभावित भएका घटनामा र गलत फैसला भएर परिवार उजाडिएका ठाउँमा बाल्न चुनौती दिएका छन् ।

उनको भनाइमा न्यायपालिकाको सुधारका लागि संस्थागत पुनर्संरचना, छिटो र सुलभ न्याय तथा जिम्मेवार प्रणाली आवश्यक छ ।

न्यौपानेले न्यायपालिकाको स्वतन्त्रता र विश्वसनीयता जोगाउन वास्तविक सुधारको बहस आवश्यक रहेको पनि बताएका छन् ।