काठमाडौं। टिकटक अब केवल सामाजिक सञ्जाल वा भिडियो शेयरिङ प्लेटफर्ममा सीमित नरहेर सबै प्रकारका डिजिटल आवश्यकताहरू पूरा गर्ने ‘सुपर एप’ बन्ने दिशामा अघि बढिरहेको छ।

सुरुमा छोटा भिडियोका लागि परिचित यो प्लेटफर्मले पछिल्ला वर्षहरूमा क्रमशः आफ्नो सेवा विस्तार गर्दै नयाँ डिजिटल इकोसिस्टम निर्माण गरिरहेको देखिन्छ।

हाल टिकटकले टिकटक शप, स्थानीय सर्चका लागि म्याप, गेमिङ र इन-एप सर्च जस्ता फिचरहरू थप्दै गएको छ। यसै क्रममा यसले हालै होटल बुकिङ सेवा पनि सुरु गरेको छ भने वित्तीय प्रविधि (फिनटेक) लाइसेन्सका लागि समेत प्रक्रिया अघि बढाएको छ।

यसले टिकटकलाई केवल मनोरञ्जन प्लेटफर्मभन्दा माथि उठाएर बहुआयामिक डिजिटल सेवा प्रदायक बनाउने संकेत गरेको छ।

चीनमा ‘विच्याट’लाई सुपर एपको सफल उदाहरण मानिन्छ, जहाँ फेसबुक, ह्वाट्सएप, डिजिटल भुक्तानी सेवा र एप स्टोरजस्ता सुविधाहरू एउटै प्लेटफर्ममा उपलब्ध छन्। टिकटकले पनि सोही मोडेललाई पछ्याउने प्रयास गरिरहेको देखिन्छ।

सन् २०२६ को जनवरीमा मुख्य रूपमा अमेरिकी स्वामित्व संरचना परिवर्तन भएपछि टिकटकले आफ्नो सेवाहरू अझ विस्तार गर्ने रणनीति लिएको छ। हालै अमेरिकामा सार्वजनिक गरिएको ‘टिकटक गो’ मार्फत प्रयोगकर्ताले एपभित्रै भिडियो हेर्दै होटल, पर्यटकीय गन्तव्य र विभिन्न अनुभवहरू खोज्न तथा बुकिङ गर्न सक्ने सुविधा पाएका छन्।

यसले प्रयोगकर्तालाई छुट्टै वेबसाइट वा एपमा जानुपर्ने आवश्यकता घटाएको छ।

यस विस्तारले गुगलको मुख्य व्यवसाय सर्च र गुगल म्याप्सलाई प्रत्यक्ष चुनौती दिएको विश्लेषण गरिएको छ। किनकि टिकटक अब केवल मनोरञ्जनको माध्यम नभई यात्रा योजना र बुकिङसम्मको पूर्ण डिजिटल प्लेटफर्म बन्नेतर्फ अघि बढिरहेको छ।

त्यसैगरी टिकटकले ब्राजिलको केन्द्रीय बैंकमा वित्तीय प्रविधि कम्पनीका रूपमा काम गर्न दुईवटा लाइसेन्सका लागि आवेदन दिएको छ। पहिलो लाइसेन्समार्फत प्रयोगकर्ताले प्रिपेड खाता सञ्चालन, रकम जम्मा तथा भुक्तानी गर्न सक्नेछन् भने दोस्रो लाइसेन्सले टिकटकलाई सिधै ऋण प्रदायक वा ऋण लिने–दिने बीचको माध्यम बन्न अनुमति दिनेछ। यसले कम्पनीलाई ई–कमर्स र डिजिटल फाइनान्स क्षेत्रमा अझ सशक्त बनाउने अपेक्षा गरिएको छ।

टिकटक शप, जुन सन् २०२१ मा परीक्षणपछि २०२३ मा अमेरिकामा औपचारिक रूपमा सुरु गरिएको थियो, अहिले अमेजन र शिन जस्ता ठूला ई-कमर्स कम्पनीहरूलाई चुनौती दिइरहेको छ।

तथ्याङ्कअनुसार यसको अमेरिकी बिक्री सन् २०२४ मा ४०७ प्रतिशत र सन् २०२५ मा १०८ प्रतिशतले बढेर १५.८२ अर्ब अमेरिकी डलर पुगेको छ।

अनुमान अनुसार सन् २०२७ सम्ममा अमेरिकाको कुल सोसल कमर्स बजारमा टिकटक शपको हिस्सा २४.१ प्रतिशत पुग्ने सम्भावना देखिएको छ। यसले टिकटकलाई ई-कमर्स क्षेत्रमा पनि शक्तिशाली प्रतिस्पर्धी बनाइरहेको छ।

मनोरञ्जन क्षेत्रमा पनि टिकटकले आफ्नो दायरा विस्तार गरेको छ। सन् २०२३ मा सुरु गरिएको टिकटक म्युजिक सेवा एक वर्षमै बन्द भए पनि हाल एप्पल म्युजिकसँगको सहकार्यमार्फत प्रयोगकर्ताले एपभित्रै पूर्ण गीत सुन्न सक्ने सुविधा पाएका छन्।

त्यसैगरी, टिकटकले नेटफ्लिक्सजस्ता स्ट्रिमिङ प्लेटफर्मसँग प्रतिस्पर्धा गर्न माइक्रोड्रामा (एक मिनेटका छोटा श्रृंखला) र मिनिस शृंखला पनि सुरु गरेको छ। प्रयोगकर्तालाई लामो समय एपमै राख्न विभिन्न क्याजुअल गेमहरू पनि उपलब्ध गराइएको छ।

यसरी टिकटकले आफूलाई केवल भिडियो हेर्ने एपबाट विस्तार गर्दै डिजिटल जीवनका लगभग सबै आवश्यकताहरू पूरा गर्ने विशाल ‘सुपर एप’ इकोसिस्टमको रूपमा रूपान्तरण गर्ने प्रयास गरिरहेको छ।