काठमाडौं । हवाई सेवा वितरण तथा खुद्रा बिक्रीसम्बन्धी नयाँ वितरण क्षमता (एनडीसी) आधारित समाधान सेवा उपलब्ध गराउँदै आएको विश्वव्यापी ट्राभल टेक्नोलोजी कम्पनी भर्टेल टेक्नोलोजिजले नेपालमा औपचारिक रूपमा सेवा प्रारम्भ गरेको घोषणा गरेको छ ।

कम्पनीले जनरल सेल्स एजेन्ट (जीएसए) स्ट्रिम ट्राभल सर्भिसेजमार्फत नेपालमा आफ्नो सेवा विस्तार गरेको हो । सोल्टी होटलमा आयोजित विशेष उद्योगगत कार्यक्रममा ५० भन्दा बढी अग्रणी ट्राभल एजेन्सी तथा पर्यटन र नागरिक उड्डयन क्षेत्रका प्रतिनिधिहरूको सहभागिता रहेको थियो ।

उक्त कार्यक्रमले नेपालमा आधुनिक हवाई सेवा वितरण तथा यात्रा खुद्रा बिक्री समाधानप्रति बढ्दो चासो र सम्भावनालाई उजागर गरेको आयोजकले जनाएको छ ।

नेपालका लागि भर्टेलको आधिकारिक प्रतिनिधिका रूपमा स्ट्रिम ट्राभल सर्भिसेजले कम्पनीको उन्नत वितरण मञ्चको स्थानीय कार्यान्वयन र प्रवर्द्धनमा सहयोग गर्नेछ ।

यसमार्फत यात्रा एजेन्सीहरूले हवाई सेवा प्रदायकहरूसँग प्रत्यक्ष पहुँच प्राप्त गर्दै प्रतिस्पर्धी भाडादर, थप सेवा सुविधा तथा सहज आरक्षण प्रणालीमा पहुँच पाउनेछन् ।

कार्यक्रममा भर्टेल टोलीले आफ्नो व्यवसाय–देखि–व्यवसाय (बी–टु–बी) मञ्चसम्बन्धी विस्तृत प्रस्तुति तथा प्रत्यक्ष प्रदर्शन गरेको थियो ।

उक्त सत्रमा एनडीसी प्रविधिमार्फत यात्रा एजेन्सीहरूले सामग्रीमा सहज पहुँच, आरक्षण कार्यक्षमता तथा ग्राहक अनुभवमा कसरी सुधार गर्न सक्छन् भन्ने विषयमा जानकारी दिइएको थियो ।

भर्टेल टेक्नोलोजिजका संस्थापक तथा प्रमुख कार्यकारी अधिकृत जेरिन जोसले नेपालमा उपस्थिति विस्तार गर्न पाउँदा उत्साहित भएको उल्लेख गर्दै नेपाली यात्रा क्षेत्रको विकासमा योगदान दिने प्रतिबद्धता व्यक्त गरे ।

त्यस्तै, स्ट्रिम ट्राभल सर्भिसेजका कार्यकारी निर्देशक आशिष के. सेनगुप्ताले नेपालमा भर्टेलको आधिकारिक जीएसए बन्न पाउनु गौरवको विषय भएको बताउँदै आधुनिक हवाई सेवा वितरण प्रविधि भित्र्याएर यात्रा व्यवसायीहरूलाई सहयोग गर्ने प्रतिबद्धता जनाए ।

भर्टेलको आगमनले नेपालमा हवाई सेवा वितरण प्रणालीलाई थप सुदृढ बनाउने तथा अन्तर्राष्ट्रिय एनडीसी सामग्रीमा पहुँच विस्तार गरी यात्रा खुद्रा बिक्री प्रणालीलाई आधुनिक बनाउने अपेक्षा गरिएको छ ।