काठमाडौं। राष्ट्रिय परीक्षा बोर्डले कक्षा १० को माध्यमिक शिक्षा परीक्षा (एसईई) २०८२ अन्तर्गत असार १ गतेदेखि ९ गतेसम्म सञ्चालन भएको पूरक परीक्षाको नतिजा सार्वजनिक गरेको छ।

बोर्डका अनुसार पूरक परीक्षाका लागि १ लाख ४८ हजार ५०७ परीक्षार्थी दर्ता भएकामा १ लाख २९ हजार १९४ जना परीक्षामा सहभागी भएका थिए। सहभागीमध्ये ८३ हजार ५२३ जना उत्तीर्ण भएका छन्।

परीक्षाफल बोर्डले तोकेका २० वटा संस्थाका वेबसाइट, आइभीआर तथा एसएमएस–यूएसएसडी सेवामार्फत हेर्न सकिने व्यवस्था गरिएको छ।

बोर्डका अनुसार पुनःपरीक्षणका लागि आवेदन असार २५ गतेदेखि ३१ गतेसम्म दिन सकिनेछ। नतिजा प्रकाशनका क्रममा कुनै प्राविधिक त्रुटि देखिएमा आवश्यक संशोधन गरिने पनि बोर्डले जनाएको छ।

त्यस्तै, परीक्षार्थीको नाम, उमेर, ठेगाना लगायत व्यक्तिगत विवरणमा त्रुटि भए सम्बन्धित जिल्ला शिक्षा अधिकारीमार्फत सच्याउन सकिने व्यवस्था गरिएको छ।

यस वर्षको एसईई पूरक परीक्षामा ७ जना परीक्षार्थीको परीक्षा रद्द गरिएको बोर्डले जनाएको छ।