काठमाडौं । नक्कली भुटानी शरणार्थी प्रकरणमा दोषी ठहर भएका पूर्वमन्त्री टोपबहादुर रायमाझीलाई ४ वर्ष कैद र ४० हजार रुपैयाँ जरिबाना हुने गरी जिल्ला अदालत काठमाडौंले सजाय निर्धारण गरेको छ।

न्यायाधीश तेजबहादुर खड्काको इजलासले मंगलबार सजाय निर्धारण गर्दै रायमाझीलाई विभिन्न कसुरमा छुट्टाछुट्टै सजाय तोकेको हो।

अदालतले ठगी कसुरमा २ वर्ष कैद र २० हजार रुपैयाँ जरिबाना, संगठित अपराधमा ३ वर्ष कैद र ३० हजार रुपैयाँ जरिबाना, राज्यविरुद्धको कसुरमा १ वर्ष ६ महिना कैद र १५ हजार रुपैयाँ जरिबाना तथा सोही कसुरअन्तर्गत थप ६ महिना कैद सजाय तोकेको छ।

विभिन्न कसुरमा तोकिएको सजायलाई एकीकृत गर्दा रायमाझीले ४ वर्ष कैद भोग्नुपर्ने र ४० हजार रुपैयाँ जरिबाना तिर्नुपर्ने अदालतको आदेश छ।

नक्कली भुटानी शरणार्थी बनाएर नेपाली नागरिकलाई अमेरिका पठाइदिने प्रलोभन देखाई ठगी गरिएको बहुचर्चित प्रकरणमा रायमाझीसहित उच्च राजनीतिक र प्रशासनिक तहका व्यक्तिविरुद्ध मुद्दा दायर भएको थियो।