काठमाडौं । श्रावण महिनाको धार्मिक आस्था, सांस्कृतिक परम्परा र आधुनिक जीवनशैलीलाई एउटै थलोमा जोड्ने उद्देश्यसहित ललितपुरको सानेपास्थित हेरिटेज गार्डेनमा दोस्रो संस्करणको ‘श्रावण मेला’ सुरु भएको छ। श्रावण ९ र १० गतेसम्म सञ्चालन हुने मेलाले पहिलो दिनदेखि नै उल्लेखनीय दर्शकको उपस्थिति आकर्षित गरेको छ।

क्लासिक्स प्रोजेक्ट्सको आयोजनामा ‘पवित्र महिनाको उत्सव’ भन्ने नारासहित सञ्चालन भइरहेको मेलामा सर्वसाधारणका लागि प्रवेश निःशुल्क गरिएको छ। आयोजकका अनुसार धार्मिक आस्था, सांस्कृतिक पहिचान, पारिवारिक जमघट र स्थानीय व्यवसायलाई प्रवर्द्धन गर्ने उद्देश्यले मेलाको आयोजना गरिएको हो।

मेलाको प्रमुख आकर्षणका रूपमा रहेको ‘बिगेस्ट मेहेन्दी भेला’ मा युवतीदेखि विवाहित महिलासम्मको उल्लेखनीय सहभागिता देखिएको छ। श्रावण महिनामा हरियो पहिरन र मेहेन्दी लगाउने परम्परालाई केन्द्रमा राखेर विभिन्न डिजाइनका मेहेन्दी कलाकारहरूले सेवासमेत उपलब्ध गराइरहेका छन्। मेहेन्दी स्टलहरूमा बिहानैदेखि दर्शकको भीड देखिएको थियो।

त्यसैगरी, मेलामा आयोजना गरिएको भजन कन्सर्ट ले धार्मिक वातावरणलाई थप जीवन्त बनाएको छ। विभिन्न कलाकार र भजन समूहले भगवान शिवलगायत धार्मिक भजन प्रस्तुत गर्दै श्रावण महिनाको आध्यात्मिक महत्वलाई संगीतमार्फत प्रस्तुत गरेका छन्। परिवारसहित मेलामा पुगेका दर्शकहरूले भजन, सांस्कृतिक प्रस्तुति र धार्मिक वातावरणको भरपुर आनन्द लिइरहेका छन्।

मेलाको अर्को मुख्य आकर्षण ‘श्रावण बजार’ हो, जहाँ बिहान ९ बजेदेखि विभिन्न धार्मिक सामग्री, श्रृङ्गारका सामग्री, हरिया चुरा, पोते, कपडा, हस्तकला, सौन्दर्य सामग्री, खाद्यान्न तथा अन्य व्यावसायिक स्टलहरू सञ्चालनमा छन्। विशेषगरी महिलाहरूको सिंगारसँग सम्बन्धित सामग्रीका स्टलहरूमा दर्शकको उल्लेखनीय चहलपहल देखिएको छ।

स्वास्थ्यप्रति सचेतना अभिवृद्धि गर्ने उद्देश्यले मेलाअन्तर्गत बिहान ६ बजेदेखि ‘श्रावण रन’ (दौड) समेत आयोजना गरिएको छ। धार्मिक उत्सवसँगै स्वस्थ जीवनशैलीलाई प्रोत्साहन गर्ने प्रयासस्वरूप आयोजित दौडमा विभिन्न उमेर समूहका सहभागीहरूको उपस्थिति रहेको आयोजकले जनाएको छ।

मेलालाई सफल बनाउन माछापुच्छ्रे बैंक, बिग मार्ट लगायत विभिन्न प्रतिष्ठित संस्थाहरूले प्रायोजन तथा व्यावसायिक सहकार्य गरेका छन्। आयोजकका अनुसार धार्मिक, सांस्कृतिक र व्यावसायिक गतिविधिलाई एउटै मञ्चमा जोड्दै श्रावण महिनाको विशेषतालाई उत्सवका रूपमा मनाउने प्रयास गरिएको हो।

आयोजकले आगामी वर्षहरूमा मेलालाई अझ बृहत् र अन्तर्राष्ट्रिय स्तरको सांस्कृतिक उत्सवका रूपमा विकास गर्ने लक्ष्य लिएको जनाएको छ। धार्मिक आस्था, मनोरञ्जन, स्वास्थ्य, व्यापार र सामाजिक भेटघाटलाई एकै स्थानमा अनुभव गर्न सकिने भएकाले ‘श्रावण मेला’ राजधानीवासीका लागि आकर्षक गन्तव्य बन्दै गएको आयोजकको विश्वास छ।