काठमाडौं। स्मार्ट टेलिकम र एनसेलसँग सम्बन्धित प्रकरणमा सोधपुछका लागि व्यवसायी उपेन्द्र महतो प्रहरीको केन्द्रीय अनुसन्धान ब्यूरो (सिआईबी) मा उपस्थित भएका छन्।

सिआईबीका प्रमुख एआईजी उमाप्रसाद चतुर्वेदीका अनुसार महतो आफैँ सिआईबी कार्यालयमा उपस्थित भएका हुन्। उनका अनुसार महतोसँग अनुसन्धानका क्रममा आवश्यक विषयमा सोधपुछ भइरहेको छ।

सरकारी नियन्त्रणमा रहेको स्मार्ट टेलिकमको सम्पत्ति गैरकानुनी रूपमा लिलामी गरी सरकारी हक समाप्त पार्ने प्रयास भएको आशंकामा सिआईबीले अनुसन्धान अघि बढाएको हो।

यसै प्रकरणमा गत वैशाख २२ गते तत्कालीन स्मार्ट टेलिकमका अध्यक्ष सर्वेश जोशी पक्राउ परेका थिए। सरकारी नियन्त्रणमा पुगिसकेको सम्पत्ति बदनियतपूर्वक लिलामी गर्न बैंकलाई मञ्जुरीनामा दिएको आरोप उनीमाथि छ।

जोशी पक्राउ परेपछि लिलामी प्रक्रियासँग जोडिएका पलिना श्रेष्ठ र नरेन्द्र उलाकलाई समेत प्रहरीले पक्राउ गरेको थियो।

महतोसँगको सोधपुछपछि प्रकरणमा उनको भूमिका र अन्य सम्बन्धित विषयमा थप तथ्य खुल्ने अपेक्षा गरिएको छ।