काठमाडौं। पाकिस्तानको ब्रोड पिकमा भएको हिमपहिरोमा ज्यान गुमाएका नेपाली आरोहीहरूको सम्झनामा काठमाडौंमा ‘ट्रिब्युट रन ५के’ आयोजना गरिएको छ।

कपनको बालुवाखानीबाट सुरु भएको पाँच किलोमिटर दौड बौद्धनाथ स्तुपामा पुगेर सम्पन्न भएको थियो। दौडमा आरोही, पर्वतारोहणप्रेमी, धावक तथा सर्वसाधारण सहभागी भएका थिए। बौद्धनाथ पुगेपछि सहभागीहरूले दिवंगत आरोहीहरूको सम्झनामा श्रद्धाञ्जली अर्पण गरेका थिए।

कार्यक्रममा ब्रोड पिक आरोहणका क्रममा ज्यान गुमाएका निर्मल पुर्जा (निम्स) नेतृत्वको नेपाली टोलीको तस्बिरमा पुष्पगुच्छा अर्पण गरिएको थियो। सहभागीहरूले दिवंगत आरोहीहरूको सम्झनामा दीप प्रज्ज्वलनसमेत गरेका थिए।

आयोजकका अनुसार ‘ट्रिब्युट रन ५के’ सामान्य दौड प्रतियोगिताभन्दा फरक रूपमा हिमाल आरोहणका क्रममा ज्यान गुमाएका आरोहीप्रति सम्मान र श्रद्धाञ्जली व्यक्त गर्ने उद्देश्यले आयोजना गरिएको हो। पर्वतारोहण क्षेत्रमा उनीहरूले पुर्‍याएको योगदानको स्मरण गर्दै शोकमा रहेका परिवारप्रति ऐक्यबद्धता जनाउनु पनि कार्यक्रमको उद्देश्य रहेको आयोजकले जनाएको छ।

ब्रोड पिकमा भएको हिमपहिरोमा नेपालीसहित विभिन्न देशका आरोहीले ज्यान गुमाएका छन्। घटनाले नेपालको पर्वतारोहण क्षेत्रमा समेत ठूलो क्षति पुर्‍याएको छ। दुर्घटनापछि दिवंगत आरोहीहरूको सम्मानमा काठमाडौंमा विभिन्न श्रद्धाञ्जली तथा दीप प्रज्ज्वलन कार्यक्रम हुँदै आएका छन्।

कार्यक्रममा सहभागीहरूले आरोहीहरूको साहस र योगदानलाई स्मरण गर्दै हिमाल आरोहणलाई थप सुरक्षित र व्यवस्थित बनाउनुपर्नेमा जोड दिएका छन्। उनीहरूले हिमाली क्षेत्रमा जोखिम न्यूनीकरण, उद्धार प्रणालीको सुदृढीकरण तथा आरोहीको सुरक्षालाई प्राथमिकतामा राख्न सम्बन्धित निकायको ध्यानाकर्षण गराएका छन्।

‘ट्रिब्युट रन ५के’मार्फत सहभागीहरूले हिमाल आरोहणका क्रममा ज्यान गुमाएका आरोहीहरूको योगदानलाई सम्मान गर्दै उनीहरूको सम्झना जीवन्त राख्ने सन्देश दिएका छन्।

तस्वीरहरू :