काठमाडौं। सत्तारुढ राष्ट्रिय स्वतन्त्र पार्टी (रास्वपा)भित्रको आन्तरिक असन्तुष्टि र गुटगत दूरी अब सामाजिक सञ्जालका अभिव्यक्तिमार्फत् समेत सतहमा आउन थालेको छ।

पार्टी सभापति रवि लामिछाने र प्रधानमन्त्री बालेन्द्र शाहनिकट समूहबीच देखिएको असहज सम्बन्ध नेताहरूका पछिल्ला गतिविधि र अभिव्यक्तिबाट थप प्रस्ट हुँदै गएको छ।

प्रतिनिधिसभाको पछिल्लो बैठकमा रास्वपाका पूर्वप्रवक्ता तथा सांसद मनिष झाले प्रधानमन्त्रीसहित सरकारको नेतृत्व गरिरहेको समूहलाई ‘कालो चश्मा’ हटाएर जनतामा देखिएको असन्तुष्टि र निराशातर्फ हेर्न आग्रह गरेका थिए। उनले सरकारले बाह्य रूपमा केही प्रतीकात्मक सुधार गरे पनि अब वास्तविक समस्या पहिचान गर्न दृष्टिकोणमै परिवर्तन आवश्यक रहेको संकेत गरेका थिए।

झाको अभिव्यक्तिपछि रास्वपाभित्रै ‘कालो चश्मा’ सामाजिक सञ्जालको व्यङ्ग्यात्मक राजनीतिक संकेत बनेको देखिएको छ।

पार्टी सभापति रवि लामिछानेनिकट मानिने नेता दीपक बोहराले फेसबुकमा आफ्नो तस्बिर सार्वजनिक गर्दै ‘मैले त कालो चश्मा खोलेँ है !’ लेखेपछि त्यसलाई प्रधानमन्त्री बालेन्द्र शाह पक्षलाई लक्षित सन्देशका रूपमा अर्थ्याउन थालिएको छ।

बोहरा लामिछानेनिकट नेताका रूपमा चिनिने भएकाले उनको उक्त अभिव्यक्तिले पार्टीभित्रको शक्ति समीकरणबारे थप चर्चा जन्माएको छ। सामान्य व्यक्तिगत तस्बिरसँग जोडिएको एउटा छोटो वाक्य भए पनि त्यसको समय र सन्दर्भलाई हेर्दा यसलाई राजनीतिक सन्देशका रूपमा बुझ्नेहरू बढेका छन्।

रास्वपाका केही नेता तथा कार्यकर्ताले समेत सामाजिक सञ्जालमा ‘कालो चश्मा खोल्ने’ शैलीका पोस्ट गर्न थालेका छन्। उनीहरूका अभिव्यक्तिमा सरकारप्रति जनतामा बढिरहेको असन्तुष्टि, सरकारको कार्यशैली र नेतृत्वको व्यवहारमाथि प्रश्न उठाइएको देखिन्छ।

यसअघि संसदमा सांसद मनिष झाले प्रधानमन्त्री शाहसहित सरकारका केही मन्त्रीलाई लक्षित गर्दै ‘कालो चश्मा’को प्रसंग उठाएका थिए।

उनको संकेत सरकार सञ्चालन गर्नेहरूले जनताको वास्तविक अवस्था, असन्तुष्टि र समस्यालाई पर्याप्त रूपमा नदेखेको भन्ने थियो। त्यसपछि सोही विषयलाई लिएर सामाजिक सञ्जालमा व्यङ्ग्य र राजनीतिक टिप्पणीको क्रम बढेको हो।

प्रधानमन्त्री शाहसहित भौतिक पूर्वाधारमन्त्री सुनिल लम्साल, गृहमन्त्री सुधन गुरुङ र शिक्षामन्त्री सस्मित पोखरेललगायत केही मन्त्री संसद् र सार्वजनिक कार्यक्रममा कालो चश्मामा देखिने गरेका छन्। यही विषयलाई लिएर संसद्को मर्यादा र सांसदको पोसाकसम्बन्धी प्रश्नसमेत उठेको थियो।

संसद् बैठकमा कालो चश्माको प्रयोगलाई लिएर आलोचना बढेपछि सभामुख डिपी अर्यालले कार्यव्यवस्था परामर्श समितिको बैठकमार्फत दलका प्रमुख सचेतक र सचेतकहरूलाई सांसदहरूले संसद्को ड्रेसकोड पालना गर्नुपर्ने विषयमा ध्यानाकर्षण गराएका थिए। संसद् बैठकमा मर्यादित र औपचारिक उपस्थितिलाई प्राथमिकता दिनुपर्ने उनको भनाइ थियो।

तर अहिले ‘कालो चश्मा’को विषय संसद्को ड्रेसकोडमा मात्र सीमित नरही रास्वपाभित्रको राजनीतिक असन्तुष्टिको प्रतीकजस्तो बन्न थालेको छ।

विशेषगरी रवि लामिछाने र प्रधानमन्त्री शाहबीचको सम्बन्ध तथा सरकार सञ्चालनमा पार्टीको भूमिका कस्तो रहने भन्ने प्रश्नसँग यसलाई जोडेर हेर्न थालिएको छ।

रास्वपाभित्र सरकार सञ्चालन र पार्टी संगठनबीचको समन्वयलाई लिएर यसअघि पनि असन्तुष्टि सार्वजनिक हुँदै आएको थियो। आफ्नै सांसदहरूले संसदमा सरकारका कामकारबाहीबारे प्रश्न उठाउनु र नेताहरूले सामाजिक सञ्जालमार्फत् सरकारको कार्यशैलीप्रति संकेतात्मक टिप्पणी गर्नुले पार्टीभित्रको असहमति अब लुकाएर राख्न कठिन हुँदै गएको देखिन्छ।

‘कालो चश्मा खोल्ने’ अभियान वास्तवमै कुनै संगठित राजनीतिक रणनीति हो वा तत्कालीन असन्तुष्टिको सामाजिक सञ्जाल अभिव्यक्ति मात्रै हो भन्ने स्पष्ट भइसकेको छैन। तर सत्ता सञ्चालनको नेतृत्व गरिरहेको प्रधानमन्त्रीकै दलका प्रभावशाली नेताहरूबाट लगातार यस्ता संकेत आउनुले रास्वपाभित्र राजनीतिक दूरी बढिरहेको अनुमानलाई भने बल पुगेको छ।

प्रधानमन्त्री शाहले पछिल्लो समय आफूलाई ‘एक्लै लड्नुपर्ने’ अवस्था आउन सक्ने आशयका अभिव्यक्ति सामाजिक सञ्जालमार्फत् दिइरहेका छन्।त्यसको केही समयमै पार्टीभित्रकै नेताहरूबाट ‘कालो चश्मा खोल्ने’ सन्देश आउनुले सरकार र पार्टी नेतृत्वबीचको सम्बन्धमाथि थप प्रश्न उठाएको छ।