काठमाडौं। यातायात व्यवस्था सेवा कार्यालयले आर्थिक वर्ष २०८२/८३ मा एक करोड ९४ लाख ४४ हजार रुपैयाँ राजस्व संकलन गरेको छ।

अघिल्लो आर्थिक वर्षको तुलनामा गत आवमा करिब ५० लाख रुपैयाँ बढी राजस्व संकलन भएको हो।

कार्यालयका अनुसार चालक अनुमतिपत्रको संख्या वृद्धि, सवारीसाधन थपिनु तथा सेवा प्रवाह छिटोछरितो हुनु राजस्व बढ्नुका प्रमुख कारण हुन्।

गत आवमा सवारीसाधन करबाट सबैभन्दा धेरै एक करोड ३९ लाख तीन हजार रुपैयाँ राजस्व संकलन भएको छ। यस्तै, सवारी दर्ता किताब दस्तुरबाट ६४ लाख ९२ हजार, पकेट तथा रुट परमिटबाट १८ लाख ८८ हजार, अग्रिम आयकरबाट ६ लाख ६८ हजार र बेरुजु असुलीबाट एक हजार ५७५ रुपैयाँ संकलन भएको कार्यालयले जनाएको छ।

सोही अवधिमा कार्यालयले विभिन्न वर्गका गरी ६२० वटा चालक अनुमतिपत्र वितरण गरेको छ। जसमा मोटरसाइकल, स्कुटर तथा मोपेड वर्ग ‘ए’ का १८८, कार, जिप तथा डेलिभरी भ्यान वर्ग ‘बी’ का ३८ तथा लाइसेन्सको प्रतिलिपि र नवीकरण ३९४ रहेका छन्।

कार्यालयका अनुसार सेवाग्राहीलाई सहज र छिटो सेवा उपलब्ध गराउने प्रयाससँगै सवारीसाधन र चालक अनुमतिपत्रसम्बन्धी कारोबार बढ्दा राजस्व संकलनमा समेत वृद्धि भएको हो।