काठमाडौं । जनआस्था साप्ताहिकका प्रधान सम्पादक किशोर श्रेष्ठलाई प्रहरी वृत्त महाराजगञ्जको हिरासतमा सारिएको छ।

यसअघि उनलाई जिल्ला प्रहरी परिसर काठमाडौंको भद्रकालीस्थित हिरासतमा राखिएको थियो।

श्रेष्ठलाई महाराजगञ्ज वृत्तको हिरासतमा राखिएको प्रहरीले पुष्टि गरेको छ।

समाचार प्रकाशनका विषयलाई लिएर एक महिलाले वैयक्तिक गोपनीयता भंग भएको आरोपमा उजुरी दिएपछि श्रेष्ठलाई साउन २७ गते राति कुसुन्तीस्थित आफ्नै निवासबाट प्रहरीले पक्राउ गरेको थियो।

पक्राउपछि उनलाई जिल्ला प्रहरी परिसर काठमाडौंको हिरासतमा राखिएको थियो। बिहीबार अदालतले श्रेष्ठलाई थप तीन दिन हिरासतमा राखेर अनुसन्धान गर्न अनुमति दिएको थियो।

यसैबीच श्रेष्ठलाई गैरकानुनी रूपमा थुनामा राखिएको दाबी गर्दै सर्वोच्च अदालतमा बन्दीप्रत्यक्षीकरणको रिट निवेदन दायर भएको छ। उक्त रिटमाथि सुनुवाइ गर्दै सर्वोच्च अदालतले श्रेष्ठलाई बरामद गरिएका सामग्रीसहित सोमबार अदालतमा उपस्थित गराउन आदेश दिएको छ।

श्रेष्ठलाई महाराजगञ्ज वृत्तमा सारिनुको कारणबारे प्रहरीले विस्तृत जानकारी सार्वजनिक गरेको छैन।