काठमाडौं।  डा. धवलशमशेर राणाले निर्वाचन आयोगमा ‘जय नेपाल पार्टी’ दर्ता गराएका छन्।

राणाले ७९ सदस्यीय केन्द्रीय समिति रहने गरी शुक्रबार आफ्नो नेतृत्वमा नयाँ राजनीतिक दल दर्ता गराएका हुन्। पार्टीको चुनाव चिन्ह ‘त्रिभुज’ राखिएको छ भने झण्डामा सेतो पृष्ठभूमिमा त्रिभुज चिन्ह रहनेछ।

नयाँ दल गठनको तयारीमा राणासँगै मेडिकल व्यवसायी एवं अभियन्ता दुर्गा प्रसाईं पनि जोडिएका थिए। तर नेतृत्व तथा शक्ति बाँडफाँटको विषयमा अन्तिम समयमा सहमति जुट्न नसकेपछि प्रसाईंलाई बाहिर राखेर राणाले पार्टी दर्ता गराएका हुन्।

दल दर्ताको प्रक्रिया अघि बढाउने क्रममा दुवै पक्षबीच सहकार्य र शक्ति बाँडफाँटबारे छलफल हुँदै आएको थियो। तर पार्टीको नेतृत्व, जिम्मेवारी र अधिकार बाँडफाँटलगायत विषयमा मतभेद भएपछि उनीहरू अलग भएका हुन्।

प्रसाईंबिनै पार्टी दर्ता भएपछि अब राणाले आफ्नै नेतृत्वमा राजनीतिक गतिविधि अघि बढाउने भएका छन्। नयाँ दलले आगामी दिनमा संगठन विस्तार र राजनीतिक एजेन्डा सार्वजनिक गर्ने तयारी गरेको बताइएको छ।

राप्रपाभित्र लामो समय सक्रिय रहेका राणा पूर्वमहामन्त्रीसमेत हुन्। राप्रपाबाट अलग भएर नयाँ राजनीतिक शक्ति निर्माणको प्रयास गरेका उनले ‘जय नेपाल पार्टी’मार्फत वैकल्पिक राजनीतिक धार अघि बढाउने तयारी गरेका छन्।

तस्वीरहरू: