काठमाडौं । प्रहरीको पोसाक तथा अन्य सामग्री खरिदसम्बन्धी उजुरीलाई लिएर रास्वपा सांसद खगेन्द्र सुनारले नेपाल प्रहरीका प्रमुखलगायत अधिकारीमाथि प्रश्न उठाएपछि गृहमन्त्री सुधन गुरुङले उजुरीकै आधारमा कसैलाई दोषी करार गर्न नमिल्ने बताएका छन्।

गत बुधबार बसेको सार्वजनिक लेखा समितिको बैठकमा प्रहरीका पोसाक तथा सामग्री खरिदसम्बन्धी विषयमा छलफल भएको थियो। उक्त बैठकमा सांसद सुनारले खरिद प्रक्रियासँग जोडिएका विषयलाई उठाउँदै प्रहरी नेतृत्व र सम्बन्धित अधिकारीप्रति प्रश्न गरेका थिए।

उक्त बैठकमा आफू उपस्थित नभएको उल्लेख गर्दै गृहमन्त्री गुरुङले शुक्रबार बसेको कानुन, न्याय तथा मानव अधिकार समितिको बैठकमा सार्वजनिक लेखा समितिमा भएको व्यवहारप्रति असन्तुष्टि जनाए।

उनले सार्वजनिक लेखा समितिमा आफ्नो अनुपस्थितिमा गृह मन्त्रालयका सचिव, सहसचिव तथा प्रहरी प्रमुखलाई गरिएको व्यवहारप्रति मन्त्रालयको ध्यानाकर्षण भएको बताए।

‘जसरी हाम्रो मेरो गैरउपस्थितिमा सचिवज्यू र सहसचिवज्यूहरू, प्रहरी प्रमुखलाई जुन व्यवहार एउटा समितिमा प्रस्तुत गर्नुभयो, त्यसमा चाहिँ गृहमन्त्रीको ध्यानाकर्षण भएको छ,’ गुरुङले भने, ‘दिस इज नट राइट, दिस इज नट गुड।’

मन्त्री गुरुङले कुनै व्यक्ति वा संस्थाविरुद्ध उजुरी पर्दैमा त्यसलाई प्रमाणित तथ्यका रूपमा लिन नहुने बताए। उजुरीको आधारमा मात्रै कसैलाई दोषी घोषणा गर्दा व्यक्तिको चरित्रमाथि समेत असर पर्ने उनको भनाइ छ।

‘उजुरीको भरमा हामी न्यायाधीश बन्न मिल्दैन। आरोप हो, जोसुकैले पनि लगाउन सक्यो। त्यसको आधारमा कसैको चरित्र हत्या गर्न पाइँदैन,’ उनले भने, ‘इट इज नट गुड। गृह मन्त्रालयकै ध्यानाकर्षण भएको छ यसमा। वि आर नट ह्याप्पी अबाउट इट।’

गृहमन्त्री गुरुङले गृह प्रशासनअन्तर्गतका कर्मचारी र नेपाल प्रहरीका अधिकारीले सरकारको नीति तथा भावनाअनुसार काम गरिरहेको दाबीसमेत गरे।

‘हाम्रा कर्मचारीहरूले जसरी काम गर्नुभएको छ, मिहिनेत गर्नुभएको छ, म प्रत्यक्षदर्शी छु। जसरी आईजी साबहरूले काम गर्नुभएको छ, म प्रत्यक्षदर्शी छु,’ उनले भने, ‘उहाँहरू हाम्रो स्पिरिटमा, विशेषगरी यो सरकारको स्पिरिटमा काम गर्न दिनरात खटिनुभएको छ, यसमा दुई मत छैन।’

उनले कुनै व्यक्तिमाथि आरोप लगाउन सहज भए पनि आरोप पुष्टि नभएसम्म दोषीको रूपमा व्यवहार गर्न नहुने बताए।

‘आरोप लगाउन जोसुकैले पनि सक्यो, तर त्यो पुष्टि नभएसम्म कसैलाई दोषी करार गरेर एउटा समितिमार्फत त्यस्तो गर्नु राम्रो होइन,’ गुरुङले भने।

प्रहरीको पोसाक तथा अन्य सामग्री खरिदसम्बन्धी उजुरीमाथि सार्वजनिक लेखा समितिमा भएको छलफलका क्रममा सांसद सुनारले विषयलाई चर्को रूपमा उठाएका थिए।

गृहमन्त्री गुरुङले भने छानबिन र प्रमाणको प्रक्रियालाई सम्मान गर्दै आरोप र प्रमाणबीच फरक छुट्याउनुपर्ने धारणा राखेका छन्।

भिडियो :