एजेन्सी। रूसले युक्रेनको राजधानी किएभ तथा आसपासका क्षेत्रमा गरेको ड्रोन र ब्यालिस्टिक मिसाइल आक्रमणमा कम्तीमा १२ जनाको मृत्यु भएको छ भने २१ जना घाइते भएका छन्।

युक्रेनी अधिकारीका अनुसार मंगलबार गरिएको आक्रमणका क्रममा किएभमा करिब एक दर्जन शक्तिशाली विस्फोट भएका थिए। आक्रमणबाट राजधानीसहित आसपासका क्षेत्रमा आवासीय भवन, रेल पूर्वाधार तथा अन्य संरचनामा ठूलो क्षति पुगेको छ।

युक्रेनी राष्ट्रपति भोलोदिमिर जेलेन्स्कीले आक्रमणमा एक भारतीय नागरिकसमेत मारिएको बताएका छन्। उनले रुसी हवाई आक्रमणबाट नागरिकको ज्यान जाने क्रम बढेको भन्दै सहयोगी राष्ट्रसँग थप हवाई प्रतिरक्षा प्रणाली उपलब्ध गराउन आग्रह गरेका छन्।

किएभमा मात्रै आठ जनाको मृत्यु भएको स्थानीय अधिकारीले बताएका छन्। मृतकमध्ये अधिकांश रेल सेवामा कार्यरत कर्मचारी रहेको जनाइएको छ। रेल डिपोमा ब्यालिस्टिक मिसाइल प्रहार भएपछि ठूलो क्षति भएको थियो।

युक्रेनी रेलवेजका प्रमुख कार्यकारी ओलेक्सान्डर पेर्टसोव्स्कीका अनुसार आक्रमणमा कम्पनीका छ जना कर्मचारीको मृत्यु भएको छ। उनका अनुसार कर्मचारीको कार्यस्थल पूर्ण रूपमा ध्वस्त भएको छ भने विभिन्न क्षेत्रमा आगलागीसमेत भएको थियो।

किएभबाहिरको बोरिस्पिल क्षेत्रमा आवासीय भवनमा समेत क्षति पुगेको छ। क्षतिग्रस्त भवनबाट करिब ५० जनालाई सुरक्षित रूपमा बाहिर निकालिएको जेलेन्स्कीले बताएका छन्। किएभ क्षेत्रका अन्य स्थानमा पनि चार जनाको मृत्यु भएको अधिकारीहरूले जनाएका छन्।

जापोरिझियामा भएको आक्रमणमा चार जना घाइते भएका छन् भने दक्षिणी ओडेसा क्षेत्रमा समेत रुसी आक्रमण भएको युक्रेनी अधिकारीहरूले बताएका छन्।

रूसको रक्षा मन्त्रालयले भने लामो दूरीका हतियार र ड्रोन प्रयोग गरी युक्रेनका विभिन्न क्षेत्रमा आक्रमण गरिएको पुष्टि गरेको छ। रुसी पक्षले किएभ आसपासका सैन्य–औद्योगिक प्रतिष्ठान तथा इन्धन र ऊर्जा पूर्वाधारलाई लक्षित गरिएको दाबी गरेको छ। ओडेसाका बन्दरगाह पूर्वाधारमा समेत प्रहार गरिएको रूसको भनाइ छ।

युक्रेनी वायु सेनाले राजधानी तथा आसपासमा ब्यालिस्टिक मिसाइलसहित अन्य हवाई आक्रमणको जोखिम कायमै रहेको भन्दै सर्वसाधारणलाई सुरक्षित आश्रयस्थलमा बस्न आग्रह गरेको छ।

यसैबीच, युक्रेनले नेटो सदस्य राष्ट्र रोमानियासँग जोडिएको सीमावर्ती क्षेत्रमा समेत रुसी ड्रोन आक्रमण भएको जनाएको छ। रोमानियाले यस वर्ष आफ्नो हवाई क्षेत्रमा प्रवेश गरेका रुसी ड्रोनमध्ये दुईवटालाई खसालेको घोषणा गरिसकेको छ।

रूस–युक्रेन युद्ध अन्त्यका लागि अमेरिकी मध्यस्थतामा वार्ता प्रक्रिया अघि बढिरहेको भए पनि दुवै पक्षबीच लामो दूरीका हवाई आक्रमण भने तीव्र बनेका छन्। पछिल्ला साताहरूमा ऊर्जा, तेल, बन्दरगाह, व्यवसाय तथा अन्य पूर्वाधारलाई लक्षित गरी दुवै पक्षबाट आक्रमण भइरहेका छन्।