एजेन्सी। अमेरिकाको न्युयोर्कस्थित व्यस्त टाइम्स स्क्वायर क्षेत्रमा भएको छुरा प्रहारमा एक महिलाको मृत्यु भएको छ भने एक पुरुष घाइते भएका छन्।

न्युयोर्क प्रहरीका अनुसार क्वीन्सका ४९ वर्षीय संदिग्धले वेस्ट ४१ स्ट्रिट र सेभेन्थ एभिन्यू नजिकै ६८ वर्षीय पुरुषलाई छुरा प्रहार गरेको करिब २० सेकेन्डपछि ३२ वर्षीया महिलालाई समेत छुरा हानेका थिए।

दुवैलाई उपचारका लागि बेलेभ्यु अस्पताल लगिएकोमा महिलाको उपचारकै क्रममा मृत्यु भएको हो। घाइते पुरुषको उपचार भइरहेको छ।

घटनापछि भागेका संदिग्ध वन टाइम्स स्क्वायरनजिकै प्रहरीको सबस्टेसनतर्फ पुगेका थिए। प्रहरीले छुरा फाल्न पटक-पटक निर्देशन दिए पनि उनी छुरा लिएर प्रहरीतर्फ अघि बढेपछि गोली चलाइएको थियो।

गोली लागेर गम्भीर घाइते भएका संदिग्धको पनि अस्पतालमा मृत्यु भएको प्रहरीले जनाएको छ।

प्रहरी आयुक्त जेसिका टिस्चले घटनामा आतंकवादसँग सम्बन्धित कुनै संकेत नदेखिएको बताएकी छन्। आक्रमणको कारण र उद्देश्यबारे अनुसन्धान भइरहेको छ।

न्युयोर्कका मेयर जोहरान ममदानीले प्रहरीको गोली प्रहारसम्बन्धी घटनाको समेत अनुसन्धान गरिने बताएका छन्।