काठमाडौं। तीज नजिकिँदै गर्दा गायिका विष्णु माझीको नयाँ गीत ‘घरबार’ सार्वजनिक भएको छ।

हरेक वर्ष तीज गीतमार्फत चर्चामा आउने माझीको यस वर्षको गीत ‘पुतलीको भट्टी’ शृंखलाको २२औँ भागका रूपमा बुधबार साँझ सार्वजनिक गरिएको हो।

सुन्दरमणि अधिकारीको शब्द तथा संगीत रहेको गीतमा विष्णु माझीले स्वर दिएकी छन्। ‘घरबार’ले विवाहपछि महिलाले भोग्ने पारिवारिक जीवन, भावना, सुख-दुःख र सम्बन्धका उतारचढावलाई गीत तथा भिडियोमार्फत प्रस्तुत गरेको छ।

करिब ११ मिनेट लामो भिडियोमा वैदेशिक रोजगारीको कथासमेत जोडिएको छ। विदेशमा रहेका श्रीमान् दुर्घटनामा परेपछि श्रीमतीले सामना गर्नुपर्ने पीडा, चिन्ता र पारिवारिक वेदनालाई कथानकको मुख्य हिस्साका रूपमा देखाइएको छ।

भिडियोमा विष्णु माझीका यसअघिका गीतमा समेत देखिइसकेकी मोडल ललिता पौडेलसँगै सुन्दरमणि अधिकारी स्वयंले अभिनय गरेका छन्। भिडियोको कोरियोग्राफी मौसम हिमालीले गरेका हुन्।

‘घरबार’ सुन्दरमणि अधिकारीकै निर्माण तथा निर्देशनमा तयार भएको हो। शम्भु चालिसेको छायांकन रहेको भिडियो मनोज कार्कीले सम्पादन गरेका छन्।

गीत सार्वजनिक भएको केही घण्टामै दर्शकको राम्रो प्रतिक्रिया देखिएको छ। बिहीबार दिउँसोसम्म अर्थात् २४ घण्टा नपुग्दै ‘घरबार’को भिडियो करिब ८ लाख पटक हेरिएको छ।

हरेक तीजमा विष्णु माझीको गीतको प्रतीक्षा गर्ने दर्शकका लागि यसपटक ‘घरबार’ले फेरि उस्तै उत्सुकता जगाएको देखिन्छ।