काठमाडौं । नेकपा एमालेका प्रमुख सचेतक ऐन महरले गृहमन्त्री सुधन गुरुङलाई सामाजिक सञ्जालमा भाइरल हुने गतिविधिभन्दा टनेलभित्र फसेका नागरिकको उद्धारमा सम्पूर्ण शक्ति केन्द्रित गर्न आग्रह गरेका छन्।

बाढीपछि टनेलबाट उद्धार गरिएका व्यक्तिलाई सुरक्षाकर्मी तथा स्वास्थ्यकर्मीले हेलिकोप्टरतर्फ लैजाँदै गर्दा गृहमन्त्रीले स्लाइन बोकेर भिडियो खिचेको प्रसंगतर्फ संकेत गर्दै महरले यस्तो आग्रह गरेका हुन्।

महरले गृहमन्त्रीले उद्धार अभियानको प्रत्यक्ष कमाण्ड सम्हाल्दै सम्बन्धित सबै निकायबीच प्रभावकारी समन्वय गर्नुपर्ने बताएका छन्। अझै अन्य टनेलमा नागरिक फसेका भए उनीहरूको उद्धारका लागि तत्काल पहल गर्न पनि उनले आग्रह गरेका छन्।

‘गृहमन्त्रीज्यू ! प्लिज तपाईं कमाण्ड सम्हाल्नुहोस्, समन्वय गर्नुहोस् र सञ्चार गर्नुहोस्,’ महरले भनेका छन्।

उनका अनुसार नागरिकको जीवन रक्षाका लागि आवश्यक परे अन्तर्राष्ट्रिय सहयोग लिनसमेत सरकार पछि हट्नु हुँदैन। सम्बन्धित आयोजनाका प्राविधिक, निर्माणकर्ता तथा विज्ञसँग तत्काल छलफल गरी उपलब्ध सबै स्रोत–साधन परिचालन गर्नुपर्ने उनको सुझाव छ।

‘आवश्यक प¥यो भने अन्तर्राष्ट्रिय सहयोग लिनुपर्‍यो। सम्बन्धित आयोजनाका प्राविधिक र निर्माणकर्तासँग छलफल गर्नुहोस्,’ उनले भनेका छन्, ‘हामीसँग राहत कोषमा अर्बौं रकम मौज्दात छ। विज्ञ तथा प्राविधिक ल्याएर छिटो काममा लागौँ।’

टनेलभित्र फसेका नागरिकका लागि एक–एक सेकेन्ड महत्त्वपूर्ण रहेको भन्दै महरले उद्धारमा उपलब्ध जनशक्ति, उपकरण र स्रोत–साधन तत्काल परिचालन गर्न आग्रह गरेका छन्।

उनले उद्धारस्थलमा गृहमन्त्री आफैँ अक्सिजन सिलिण्डर बोक्नुभन्दा उद्धार अभियानको नेतृत्व र व्यवस्थापनमा ध्यान दिनुपर्ने बताएका छन्।

‘तपाईंको काम त्यो अक्सिजन सिलिण्डर बोक्ने होइन। तपाईंले गर्दा त्यहाँ काम गर्ने मान्छेलाई डिस्टर्ब भइरहेको छ,’ महरले भनेका छन्।

उद्धारस्थलबाट हट्न सेनाले यसअघि आग्रह गरेको प्रसंगसमेत स्मरण गराउँदै उनले गृहमन्त्रीलाई आफ्नो भूमिकाबारे पुनर्विचार गर्न सुझाव दिएका छन्।

‘तपाईं यहाँबाट गइदिनुहोस् भनेर सेनाले अस्ति मात्रै भनेको किन बिर्सिनुभयो ?’ उनले प्रश्न गरेका छन्।

सिलिण्डर बोक्ने काम उद्धारमा खटिएका सुरक्षाकर्मीले नै गर्न सक्ने भन्दै महरले गृहमन्त्रीले त्यसभन्दा महत्त्वपूर्ण जिम्मेवारी सम्हाल्नुपर्ने बताएका छन्।

‘त्यो सिलिण्डर बोक्ने काम त त्यहाँ खटिएको एक जना प्रहरी जवानले गरिहाल्नुहुन्छ नि। त्यसका लागि गृहमन्त्री चाहिँदैन,’ महरको भनाइ छ।

गृहमन्त्री आफैँ सामाजिक सञ्जालमा चर्चामा आउने व्यक्ति भएकाले उद्धारस्थलमा ‘स्टन्ट’ गर्नुभन्दा संकटको नेतृत्व र समन्वयमा ध्यान दिनुपर्ने महरको भनाइ छ।