काठमाडौं । प्रहरीले देशका विभिन्न स्थानबाट लागूऔषधसहित २० जनालाई पक्राउ गरेको छ। आइतबार भक्तपुर, बाँके, सुनसरी, सुर्खेत, कैलाली, तनहुँ, सर्लाही र पर्सामा गरिएको छुट्टाछुट्टै कारबाहीमा उनीहरू पक्राउ परेका हुन्।

भक्तपुरको मध्यपुर थिमि-१ लोकन्थलीबाट करिब २ ग्राम खैरो हेरोइनजस्तो पदार्थसहित २९ वर्षीय राजु थारू पक्राउ परेका छन्।

बाँकेको नेपालगञ्ज-२ बागेश्वरी मन्दिर अगाडिबाट १०७ ग्राम ५५० मिलिग्राम ब्राउनसुगरजस्तो पदार्थसहित ३० वर्षीय देशराज चौहान र २५ वर्षीया पूजा चौहान पक्राउ परेका छन्।

सुनसरीको इटहरी-५ तुलसाटोलबाट ३६० मिलिग्राम खैरो हेरोइनजस्तो पदार्थसहित २३ वर्षीय बसन्त खत्री पक्राउ परेका छन्। सुर्खेतको वीरेन्द्रनगर–५ चिसापानीबाट १ ग्राम ३८० मिलिग्राम ब्राउनसुगरजस्तो पदार्थसहित ३४ वर्षीय बिनोद थापा पक्राउ परेका छन्।

कैलालीको धनगढी-७ भानुचोकबाट ४६० मिलिग्राम ब्राउनसुगरजस्तो पदार्थसहित चार जना पक्राउ परेका छन्। साथै, जानकी गाउँपालिका–८ भोक्सीबाट १ ग्राम ८८० मिलिग्राम खैरो हेरोइनजस्तो पदार्थसहित ४८ वर्षीय प्रमेश्वर डगौरा थारू पक्राउ परेका छन्।

त्यस्तै, सुनसरीकाे इनरुवा-४ महेन्द्र राजमार्गबाट १ ग्राम ८० मिलिग्राम ब्राउनसुगरजस्तो पदार्थ, ट्रामाडोल ५३० ट्याब्लेट र नाइट्राजेपाम १० ट्याब्लेटसहित ३१ वर्षीय निरोज माली र ३० वर्षीय दिपेश नेपाली पक्राउ परेका छन्।

तनहुँको आँबुखैरेनी-४ बेनीटारबाट डाईजेपाम, फेनारगन र बुप्रेनोर्फिन २३/२३ एम्पुलसहित नवराज परियार र सन्तोष गुरुङ पक्राउ परेका छन्। साथै, सर्लाहीको हरिवन–९ बाट ३ हजार ५१४ ट्याब्लेट टापेन्टाडोलसहित प्रदीप महतो र सुरज थापा पक्राउ परेका छन्।

पर्साको पटेर्वा सुगौली–१ मलाही टोलबाट ३० किलो गाँजासहित नन्दलाल सहनी र महेश सहनी पक्राउ परेका छन्। अनुसन्धानका क्रममा गाँजा ओसारपसारमा संलग्न रहेको खुलेपछि ७५ वर्षीया भुरी चौधरीलाई पनि प्रहरीले पक्राउ गरेको छ।

प्रहरीले थप अनुसन्धान भइरहेको जनाएको छ।