कलाकार सर्विन बोगटी पक्राउ
काठमाडौं । सामाजिक सञ्जालमा गृहमन्त्री सुधन गुरुङकी आमा भएको दाबी गरिएकी महिलाको भिडियो सार्वजनिक गरेका कलाकार सर्विन बोगटीलाई प्रहरीले पक्राउ गरेको छ।
भक्तपुरको सूर्यविनायकस्थित निवासबाट उनलाई मंगलबार प्रहरीले नियन्त्रणमा लिएको हो। जिल्ला प्रहरी परिसर काठमाडौंका प्रहरी उपरीक्षक दानबहादुर थापाका अनुसार बोगटीमाथि वैयक्तिक गोपनीयतासम्बन्धी कसुरमा अनुसन्धान भइरहेको छ।
प्रहरीले अनुसन्धान अघि बढाउन अदालतबाट सात दिनको म्याद थप गराएको छ। उनीमाथि सार्वजनिक गरिएको भिडियोसँग सम्बन्धित विषयमा आवश्यक अनुसन्धान भइरहेको प्रहरीले जनाएको छ।
केही दिनअघि बोगटीले सामाजिक सञ्जालमार्फत एक महिलाको भिडियो सार्वजनिक गरेका थिए। उक्त भिडियोमा ती महिलालाई गृहमन्त्री सुधन गुरुङकी आमा भएको दाबी गरिएको थियो। भिडियो सार्वजनिक भएपछि यस विषयले सामाजिक सञ्जालमा चर्चा पाएको थियो।
त्यस्तै, बोगटीलाई नियन्त्रणमा लिने क्रममा प्रहरी सादा पोसाकमा उनको घर पुगेको परिवारजनको भनाइ छ। उनीहरू आफूलाई इन्टरनेट सेवा प्रदायक कम्पनी वर्ल्डलिंकका कर्मचारीका रूपमा परिचय दिएर घर पुगेको परिवारजनले बताएका छन्।
कालिकोट स्थायी ठेगाना भएका बोगटी लामो समयदेखि परिवारसहित भक्तपुरको सूर्यविनायकमा बस्दै आएका छन्। उनी गायन तथा संगीत सिर्जनामा सक्रिय रहनुका साथै जनसांस्कृतिक क्षेत्रमा पनि परिचित छन्।
साथै, घटनाबारे प्रहरीले थप अनुसन्धान गरिरहेको छ।
