वासिङन । अमेरिकी विदेशमन्त्री मार्को रुबियोले युक्रेन सम्झौतासँग सम्बन्धित रुसमाथिको प्रतिबन्ध हटाउनेबारे छलफल भएको भनी अमेरिकी मिडियामा हालै आएको एक रिपोर्टको खण्डन गरेका छन् । उनले उक्त रिपोर्टलाई ‘स्पष्ट रूपमा झूटो’  भनेका छन् ।

 पोलिटिको प्रकाशनलाई ‘पत्रकारिता दुरुपयोग’ को आरोप लगाउँदै रुबियोले एक्समा एक पोस्टमा भनेका छन् “यो स्पष्ट रूपमा झूटो हो । न त स्टिभ विटकफ (अमेरिकी मध्यपूर्व विशेष दूत) न मैले युक्रेनसँगको सम्झौताको हिस्साका रूपमा रुसविरुद्धको प्रतिबन्ध हटाउनेबारे कुनै वार्ता गरेका छौँ । यो पत्रकारिताको दुरुपयोग हो । यदि पोलिटिकोमा एक औँस अखण्डता छ भने उनीहरूले यो काल्पनिक कथालाई पूर्ण रूपमा फिर्ता लिनुपर्दछ ।”

पोलिटिकोले स्रोतलाई उदृत गर्दै एक रिपोर्टमा ह्वाइट हाउसले रुस र युक्रेनबीचको युद्ध अन्त्य गर्ने छलफलको एक हिस्साका रूपमा रुसको नोर्ड स्ट्रिम२ प्राकृतिक ग्यास पाइपलाइन र युरोपमा सम्भावित अन्य रूसी सम्पत्तिहरूमा प्रतिबन्ध हटाउनेबारे छलफल गरिरहेको बताएको छ ।

रुसको प्राकृतिक ग्यास क्षेत्रलाई पश्चिमी युरोपसँग जोड्ने मुख्य पाइपलाइनहरू मध्ये एकमा हाल लगाइएको प्रतिबन्ध हटाउने कुरा राष्ट्रपति डोनाल्ड ट्रम्पको पहिलो कार्यकालमा पहिलो पटक राखिएको अमेरिकी नीतिमा तीव्र परिवर्तन हुने पोलिटिकोले रिपोर्ट गरेको छ । 

पूर्वराष्ट्रपति जो बाइडेनले आफ्नो कार्यकालको सुरुमा ती प्रतिबन्धहरू हटाएका थिए तर रुसी राष्ट्रपति भ्लादिमिर पुटिनले सन् २०२२ मा युक्रेनमा आक्रमण सुरु गरेपछि तिनीहरूलाई पुनः लागू गरे ।

पोलिटिकोले उदृत गरेको स्रोतका अनुसार ह्वाइट हाउसका विशेष दूत स्टिभ विटकफले रुसविरुद्ध प्रतिबन्धहरू कम गर्नका लागि प्रमुख वकालत गर्दै आएका छन् ।

मस्कोका लागि डोनाल्ड ट्रम्पका दूतको रूपमा आफ्नो कार्यकालमा भ्लादिमिर पुटिनसँग मित्रता बनाएका विटकफले आफ्नो टोलीलाई जारी छलफलको एक हिस्साको रूपमा रुसमाथि लगाइएको अमेरिकी ऊर्जा प्रतिबन्धहरूको विस्तृत सूची सङ्कलन गर्न निर्देशन दिएका छन् ।

बाल्टिक सागर हुँदै जर्मनीमा ग्यास ढुवानी गर्न निर्माण गरिएको दुई नर्ड स्ट्रिम २ पाइपलाइनहरू मध्ये एउटा सन् २०२२ मा भएको विस्फोटको बावजुद कार्यशील रहेको छ ।

यसले नजिकैको नर्ड स्ट्रिम१ को दुवै पाइपलाइनहरूसहित यसको एउटा लाइनलाई क्षति पुर्याएको छ । सन् २०२२ सेप्टेम्बरको विस्फोटले ग्यास आपूर्ति अवरुद्ध गरेको थियो र यसको अझै अनुसन्धानमा जारी छ । केही रिपोर्टले युक्रेनी नागरिकहरूको सम्भावित संलग्नताको सुझाव दिएका छन् ।