काठमाडौं। नेपाली कांग्रेसका सभापति गगन थापाले सरकारप्रति कडा टिप्पणी गर्दै कांग्रेसले प्रश्न गर्ने, खबरदारी गर्ने र आवश्यक विकल्प समेत प्रस्तुत गर्ने भूमिका निरन्तर निर्वाह गरिरहेको बताएका छन्।

कांग्रेस संसदीय दलको बैठकलाई सम्बोधन गरेपछि पत्रकारहरूसँग कुरा गर्दै उनले सरकारको कार्यशैलीप्रति असन्तुष्टि जनाए। उनले ‘बालेन सरकार भ्रममा छ’ भन्दै वर्तमान सरकारलाई पूर्वप्रधानमन्त्री केपी शर्मा ओलीको कार्यकालसँग तुलना गरे।

थापाले संविधानअनुसार अध्यादेश ल्याउने व्यवस्था भए पनि त्यसको नियत के हो भन्ने कुरा महत्वपूर्ण हुने बताए। उनले अहिले ल्याइएका केही अध्यादेशप्रति गम्भीर प्रश्न उठेको उल्लेख गर्दै संसदमा आउने प्रतिस्थापन विधेयकमार्फत आवश्यक संशोधन गर्नुपर्ने धारणा राखे।

विशेषगरी संवैधानिक परिषद्सम्बन्धी अध्यादेशप्रति कांग्रेसको कडा आपत्ति रहेको उनले स्पष्ट पारे। उनले संवैधानिक परिषद्लाई ‘वाचडग’ को रूपमा परिकल्पना गरिएको भन्दै सरकार प्रमुखको मनोमानी रोक्न यसको व्यवस्था गरिएको बताए।

तर विभिन्न प्रधानमन्त्रीहरूले संविधानमै छेडखानी गर्दै आएको आरोप लगाउँदै उनले हालका प्रधानमन्त्रीले समेत संवैधानिक परिषद्मा बहुमत सुनिश्चित हुने गरी संशोधन गरेर ‘जालझेल’ गरेको टिप्पणी गरे। उनका अनुसार प्रधानमन्त्री, सभामुख र कानुनमन्त्री मिलेर बहुमत कायम हुने गरी गरिएको संशोधन गलत अभ्यास हो।

थापाले संविधानमाथि यस्तो प्रकारको हस्तक्षेप स्वीकार्य नहुने भन्दै सरकारलाई जिम्मेवार बन्न आग्रह समेत गरे।