काठमाडौं। नयाँ सार्वजनिक सवारी साधनको दर्ता रोक्ने संघीय सरकारको निर्णयबीच बागमती प्रदेश सरकारले दर्ता प्रक्रिया यथावत् सञ्चालन गर्न निर्देशन दिएको छ।

श्रम, रोजगार तथा यातायातमन्त्री जयराम थापाले सवारी दर्ताको अधिकार प्रदेश सरकारसँग रहेकाले हाल दर्ता नरोकिने बताएका छन्।

संघीय सरकारको पत्र प्राप्त भए पनि त्यसबारे अध्ययन भइरहेको र यातायात कार्यालयमा नियमित रूपमा काम भइरहेको उनले जानकारी दिए।

संघीय सरकारले दुई साताअघि ईभीसहित नयाँ सार्वजनिक सवारी साधनको दर्ता अर्को सूचना नभएसम्मका लागि रोक्ने निर्णय गरेको थियो।

व्यवसायीहरूले भने दर्ता रोकिँदा ऋण, ब्याज र किस्ता भुक्तानीमा समस्या हुने गुनासो गरेका थिए।