काठमाडौं। नेकपा (एमाले)का उपमहासचिव योगेश भट्टराईले पार्टी अध्यक्ष केपी शर्मा ओलीलाई लक्षित गर्दै व्यङ्ग्यात्मक टिप्पणी गरेका छन्।

अध्यक्ष ओलीको अभिव्यक्तिपछि उनले पुरानो प्रसंग स्मरण गर्दै कटाक्ष गरेका हुन्।

कार्यक्रममा बोल्दै अध्यक्ष ओलीले भनेका थिए, ‘शिर काटेर टेबलमा राखिदिने हो भने जीउले मात्र पार्टी एकता हुन्छ भन्ने मानसिकता पार्टी हितमा छैन।’

उनले पार्टीको समीक्षा हुनुपर्ने भन्दै हस्ताक्षर अभियान र विभिन्न गतिविधिले पार्टी एकताबद्ध नहुने धारणा पनि व्यक्त गरेका थिए।

ओलीको अभिव्यक्तिपछि उपमहासचिव योगेश भट्टराईले एमालेको सातौँ राष्ट्रिय महाधिवेशनको बन्दसत्रमा एक वरिष्ठ नेताले सुनाएको कथा स्मरण गरेका थिए।

उनले बसभित्रको डन्डी समातेर आफूले बस पल्टिनबाट जोगाएको दाबी गर्ने एक वृद्धको कथा सुनाएको उल्लेख गर्दै व्यङ्ग्य गरेका हुन्।

उनको भनाई जस्ताको त्यस्तै:

नेकपा एमालेको सातौ राष्ट्रिय महाधिवेशनको (जनकपुर)बन्द सत्रमा पार्टीका एकजना बरिष्ठ नेताले भाषणका क्रममा यस्तो कथा सुनाउनु भएको थियो। एकजना बुढा मानिस बसमा चढेछन् । सीट खाली थिए तर ऊनी सीटमा बसेनन् । उभिएर बसभित्रको फलामको डन्डी च्याप्प समाए । बाटो उबड खवाड थियो । बस गुड्न सुरु गर्यों । बस घरी दायाँ ढल्किन्थ्यो बुढा मानिस बसको डन्डीलाई बायाँ तिर जोडले तान्थे । फेरी बस बायाँ ढल्किन्थ्यो बुढा मानिस डन्डीलाई जोडले दायाँ तान्थे ।

यही रीतले बस अघि बढी रह्यो । बुढा मानिस सोही क्रिया गरिरहे । बुढा असिन पसिन भए । बस गन्तव्यमा पुगेर रोकियो । सबै यात्रु बाहिर निस्के । बुढाले सबैलाई जम्मा गरेर भने आज तपाईँहरू सबै मेरो कारणले बच्नु भयो । यात्रुहरू छक्क परेर सोधे कसरी । बुढाले सगौरव भने पल्टिन लागेको बसलाई डन्डीमा तानेर मैले पल्टिनबाट जोगाए र तपाईँहरू बच्नु भयो ।

आज मलाई यो कथाको खुब सम्झना भयो ।