काठमाडौं । फिफा विश्वकप २०२६ को अन्तिम १६ मा अर्जेन्टिनासँग ३-२ गोलले पराजित हुँदै प्रतियोगिताबाट बाहिरिएपछि इजिप्ट फुटबल संघले खेलका मुख्य रेफ्री र भिडियो सहायक रेफ्री टोलीविरुद्ध फिफामा औपचारिक उजुरी दर्ता गरेको छ।

इजिप्टले खेलका क्रममा आफूहरूमाथि गम्भीर रेफ्रिङ त्रुटि भएको दाबी गर्दै फ्रान्सेली रेफ्री फ्रान्स्वा लेटेक्सिएर र उनको अफिसियटिङ टोलीमाथि कारबाही गर्न माग गरेको हो। संघले रेफ्रीको निर्णय निष्पक्ष नभएको आरोप लगाउँदै आगामी विश्वकपका खेलमा उनीहरूलाई जिम्मेवारी नदिन र घटनाबारे स्वतन्त्र तथा गहिरो छानबिन गर्न फिफासँग आग्रह गरेको जनाएको छ।

इजिप्टको दाबीअनुसार खेलमा मोस्तफा जिकोले गरेको वैध गोललाई विवादास्पद रूपमा अमान्य घोषित गरिएको थियो। त्यस्तै, खेल २–२ को बराबरीमा रहेका बेला अर्जेन्टिनाको पेनाल्टी क्षेत्रमा मोहम्मद सालाहमाथि फाउल हुँदा पनि रेफ्रीले पेनाल्टी नदिएको आरोप इजिप्टले लगाएको छ। त्यसको केही क्षणपछि अर्जेन्टिनाले काउन्टर आक्रमणमार्फत विजयी गोल गर्दै क्वार्टरफाइनलमा स्थान बनाएको थियो।

इजिप्ट फुटबल संघले रेफ्रीको निर्णयमा दोहोरो मापदण्ड अपनाइएको दाबी गर्दै त्यसका कारण आफ्नो टोलीले अन्यायपूर्ण रूपमा प्रतियोगिताबाट बाहिरिनुपरेको जनाएको छ। संघका अनुसार यस्ता विवादास्पद निर्णयले विश्वकपजस्तो प्रतिष्ठित प्रतियोगिताको विश्वसनीयतामाथि नै प्रश्न उठाएको छ।

खेलपछि इजिप्टका मुख्य प्रशिक्षक होसाम हसनले पनि रेफ्रीको निर्णयप्रति तीव्र असन्तुष्टि व्यक्त गरेका छन्। उनले आफ्नो टोलीसँग अन्याय भएको दाबी गर्दै रेफ्रिङ स्तरमाथि गम्भीर प्रश्न उठाए। आक्रोश व्यक्त गर्दै हसनले अब आफूले कहिल्यै विश्वकप नहेर्ने घोषणा समेत गरेका छन्।

यद्यपि, फिफाले इजिप्टको उजुरीबारे औपचारिक प्रतिक्रिया सार्वजनिक गरेको छैन। अब विश्व फुटबलको सर्वोच्च निकायले उजुरीमाथि कस्तो निर्णय लिन्छ भन्ने विषय फुटबल समर्थकहरूको चासोको विषय बनेको छ।