काठमाडौं। फ्रान्सले १५ वर्षमुनिका बालबालिकाको सामाजिक सञ्जाल प्रयोगमा कडा कानुनी नियन्त्रण लागू गर्ने भएको छ।

फ्रान्सेली संसदबाट पारित भएको नयाँ कानुन आगामी सेप्टेम्बर १, २०२६ देखि कार्यान्वयनमा आउनेछ।

नयाँ व्यवस्थाअनुसार १५ वर्षभन्दा कम उमेरका बालबालिकाले अभिभावकको स्पष्ट सहमतिबिना फेसबुक, इन्स्टाग्राम, टिकटक, स्न्यापच्याट, एक्स (पूर्व ट्विटर), युट्युब र व्हाट्सएपजस्ता सामाजिक सञ्जालमा नयाँ खाता खोल्न वा ती प्लेटफर्म प्रयोग गर्न पाउने छैनन्।

फ्रान्स सरकारले बालबालिकाको मानसिक स्वास्थ्य संरक्षण, साइबरबुलिङ न्यूनीकरण र सुरक्षित डिजिटल वातावरण निर्माण गर्ने उद्देश्यले यो कानुन ल्याएको जनाएको छ। कानुनको पालना नगर्ने सामाजिक सञ्जाल कम्पनीलाई कडा आर्थिक जरिबाना गर्ने व्यवस्था पनि गरिएको छ।

यद्यपि, अनलाइन विश्वकोश, शैक्षिक सामग्री, वैज्ञानिक सूचना तथा अध्ययन–अनुसन्धानसँग सम्बन्धित डिजिटल सेवाहरू भने यस प्रतिबन्धको दायरामा पर्ने छैनन्।

फ्रान्सले यसअघि नै विद्यालय परिसरमा मोबाइल फोन प्रयोगमा प्रतिबन्ध लगाइसकेको छ। अब सामाजिक सञ्जालसम्बन्धी नयाँ कानुन कार्यान्वयनमा आएपछि बालबालिकाको डिजिटल सुरक्षालाई थप प्रभावकारी बनाउने सरकारको अपेक्षा छ।

यसअघि अष्ट्रेलियाले पनि १६ वर्षमुनिका किशोरकिशोरीका लागि सामाजिक सञ्जाल प्रयोगमा प्रतिबन्ध लगाउने कानुन पारित गरेको थियो।

तर १५ वर्षमुनिका बालबालिकाको सामाजिक सञ्जाल प्रयोगलाई अभिभावकको सहमतिसँग जोडेर व्यापक कानुनी व्यवस्था लागू गर्ने मुलुकमध्ये फ्रान्स अग्रपंक्तिमा पुगेको बताइएको छ।