काठमाडौं। दक्षिण कोरियाली प्रविधि कम्पनी सामसङले आफ्नो पहिलो स्मार्ट चस्माबारे विस्तृत जानकारी सार्वजनिक गर्दै वेरेबल एआई डिभाइसको बजारमा औपचारिक प्रवेश गर्ने तयारी गरेको छ। कम्पनीले यो चस्मालाई स्मार्टफोनको विकल्पका रूपमा नभई मोबाइल प्रयोगलाई अझ सहज, बुद्धिमानी र उपयोगी बनाउने सहायक उपकरणका रूपमा विकास गरिएको जनाएको छ।

मे महिनामा आयोजित गुगल आई/ओ सम्मेलनमा पहिलो झलक देखाएको सामसङले हालै सम्पन्न ग्यालेक्सी अनप्याक्ड कार्यक्रमपछि पत्रकार सम्मेलनमार्फत डिभाइसका डिजाइन, प्रविधि, फिचर र रणनीतिबारे थप जानकारी सार्वजनिक गरेको हो। सामसङका कार्यकारी उपाध्यक्ष तथा एक्सटेन्डेड रियालिटी (एक्सआर) अनुसन्धान तथा विकास टोलीका प्रमुख जेम्स चोईले स्मार्ट चस्मा कम्पनीको आगामी पुस्ताको एआई–आधारित वेरेबल रणनीतिको महत्वपूर्ण हिस्सा भएको बताए।

उनका अनुसार यो डिभाइस स्मार्टफोनलाई विस्थापित गर्न होइन, प्रयोगकर्ताले फोन प्रयोग गर्ने तरिकालाई अझ सहज र प्रभावकारी बनाउन डिजाइन गरिएको हो। स्मार्टफोन विकासमा लामो अनुभव रहेकाले आफूहरूले हलुका, आरामदायी र दैनिक प्रयोगका लागि उपयुक्त स्मार्ट चस्मा तयार गरेको उनको दाबी छ।

सामसङले प्रतिस्पर्धी कम्पनी मेटाको भन्दा फरक अवधारणा अपनाएको बताएको छ। कम्पनीका अनुसार स्मार्ट चस्माको तौल न्यून राख्दै लामो समयसम्म सहज रूपमा लगाउन सकिने गरी डिजाइन गरिएको छ। साथै, स्मार्टफोनमा प्रयोग हुने गुणस्तर परीक्षणकै मापदण्ड यसमा पनि लागू गरिएको छ।

चस्माले ड्रप टेस्ट, उच्च तापक्रम, धुलो, बाहिरी वातावरण, सनस्क्रिन, कस्मेटिक्सलगायत रसायनको प्रभाव परीक्षण सफलतापूर्वक पार गरेको कम्पनीले जनाएको छ। टिकाउपन सुनिश्चित गर्न सामसङले थप २० नयाँ परीक्षण प्रक्रिया समेत विकास गरेको छ।

सामसङको स्मार्ट चस्मा क्वालकमको चिपसेटबाट सञ्चालित हुनेछ। यसलाई प्रयोग गर्न स्मार्टफोनसँग जोड्नुपर्ने (टेथर्ड) व्यवस्था गरिएको छ।

यसमा जडान गरिएको इन–बिल्ट क्यामेराले प्रयोगकर्ताले देखिरहेको दृश्यको फोटो तथा भिडियो खिच्न सक्नेछ। साथै, ह्वाइटबोर्ड, प्रस्तुति वा कागजातमा रहेका सामग्री स्क्यान गरेर मुख्य बुँदा नोटका रूपमा तयार गर्न सक्ने सुविधा पनि उपलब्ध हुनेछ।

मोबाइलमा आएका लामो सन्देशलाई एआईमार्फत संक्षेप गरी चस्माभित्र रहेका स्पिकरबाट सुनाउन सक्ने क्षमता पनि यसमा रहनेछ। कम्पनीले चस्मासँगै पोर्टेबल चार्जिङ केस पनि उपलब्ध गराउने जनाएको छ।

हातको इसाराले नियन्त्रण

सामसङले स्मार्ट चस्मामा जेस्चर कन्ट्रोल प्रणाली पनि विकास गरिरहेको छ। ग्यालेक्सी स्मार्टवाच लगाएका प्रयोगकर्ताले हातको इसारामार्फत चस्माका विभिन्न फिचर नियन्त्रण गर्न सक्नेछन्।

त्यस्तै, कम्पनीको ग्यालेक्सी रिङमार्फत पनि जेस्चर कन्ट्रोल सम्भव हुने संकेत जेम्स चोईले दिएका छन्। कम्पनीका अनुसार आगामी शरद ऋतु (फल सिजन) मा बजारमा आउँदा यो चस्मा विभिन्न डिजाइन र रंगमा उपलब्ध हुनेछ।

स्मार्ट चस्माको डिजाइन विकासका लागि सामसङले प्रसिद्ध आईवेयर ब्रान्ड Gentle Monster र Warby Parker सँग सहकार्य गरेको छ।

स्मार्ट चस्माको बजारमा अहिले मेटाको रे–ब्यान सिरिजको स्पष्ट दबदबा छ। बजार अनुसन्धान संस्था आईडीसीका अनुसार सन् २०२६ को पहिलो त्रैमासिकसम्म स्मार्ट चस्मा बजारमा मेटाको हिस्सा करिब ६९.२ प्रतिशत रहेको छ।

मेटाले हालै २९९ डलरको इन्ट्री–लेभल स्मार्ट चस्मा र ७९९ डलर मूल्यको डिस्प्लेयुक्त रे–ब्यान मोडल सार्वजनिक गरिसकेको छ। यस्तो अवस्थामा सामसङले प्रिमियम सेग्मेन्टमा प्रतिस्पर्धा गर्ने रणनीति लिएको छ।

यद्यपि कम्पनीले मूल्य भने अझै सार्वजनिक गरेको छैन। जेम्स चोईका अनुसार उत्पादनलाई प्रिमियम श्रेणीमा राखिने भए पनि अत्यधिक महँगो बनाइने छैन। उनले गुणस्तरअनुसार उचित मूल्य निर्धारण गरिने बताए।

आईडीसीका विश्लेषक फ्रान्सिस्को जेरोनिमोले सामसङको स्मार्ट चस्माको मूल्य ६०० देखि ७०० डलरबीच हुन सक्ने अनुमान गरेका छन्। तर मेटाको उत्पादनभन्दा उल्लेखनीय अतिरिक्त सुविधा नदिई उच्च मूल्य तोकिए बिक्रीमा चुनौती आउन सक्ने उनको भनाइ छ।

पीपी फोरसाइटका संस्थापक पाओलो पेस्काटोरेका अनुसार सामसङको प्रवेशले मेटालाई चुनौती त दिनेछ, तर बजारमा सफल हुन उपभोक्तालाई दैनिक जीवनमा उपयोगी हुने स्पष्ट कारण दिनुपर्नेछ।

उनका अनुसार सामसङसँग ठूलो स्मार्टफोन प्रयोगकर्ता आधार भए पनि उनीहरूलाई नयाँ वेरेबल डिभाइस खरिदतर्फ आकर्षित गर्नु कम्पनीका लागि सहज हुने छैन।

सामसङले स्मार्ट चस्मालाई सुरुवाती चरणमा सीमित प्रयोगकर्ता समूह लक्षित उत्पादनका रूपमा अघि बढाउने जनाएको छ। कम्पनीले तत्काल ठूलो मात्रामा बिक्री गर्ने लक्ष्य नराखेको स्पष्ट पारेको छ।