काठमाडौं। प्रधानमन्त्री वालेन्द्र शाह (बालेन)ले सुदूरपश्चिममा पुगेर ‘सुदूर अब दूर छैन, झिक्कै झिक्कै माया तमलाई’ भनेका थिए। तर, सरकारले हालै गरेको प्रज्ञा प्रतिष्ठानका नियुक्तिले भने यही आश्वासनमाथि प्रश्न उठाएको छ।

ती नियुक्तिहरु हेर्दा लाग्छ सुदुरपश्चिम दुर मात्रै हैन अर्कै देशको हो। अथवा कर्णाली पारी अर्को राज्य पनि छ भन्ने अनुभूति प्रज्ञा प्रतिष्ठानका नियुक्तिहरुले देखाउछ।

सरकारले नेपाल प्रज्ञा प्रतिष्ठान, नेपाल ललितकला प्रज्ञा प्रतिष्ठान तथा नेपाल सङ्गीत तथा नाट्य प्रज्ञा प्रतिष्ठानमा कुलपति, उपकुलपति, सदस्य-सचिव र परिषद् सदस्य नियुक्त गरेको छ। २९ जना पदाधिकारी नियुक्त हुँदा सुदूरपश्चिमबाट एक जना पनि परेका छैनन्।

यद्यपि, परिषद् सदस्यतर्फ भने सुदूरपश्चिमका ९ जना समेटिएका छन्। नेपाल प्रज्ञा प्रतिष्ठानमा ६, ललितकलामा १ तथा सङ्गीत तथा नाट्य प्रतिष्ठानमा २ जना सुदूरपश्चिमका छन्।

तर, महत्वपूर्ण पदाधिकारी चयनमै प्रदेशलाई पूर्ण रूपमा बाहिर राखिएको भन्दै साहित्यकार, कलाकार तथा संस्कृतिकर्मीले सरकारको आलोचना गरेका छन्। उनीहरूको प्रश्न छ-सुदूरपश्चिम नेपालमै पर्दैन कि त्यहाँ योग्य स्रष्टा नै छैनन् ?

सुदूरपश्चिमलाई कला, साहित्य, सङ्गीत र संस्कृतिमा समृद्ध क्षेत्र मानिँदै आए पनि राज्यका प्रमुख सांस्कृतिक संस्थामा नेतृत्व तहमा प्रतिनिधित्व नहुनुले सरकारको समावेशी नियुक्तिमाथि प्रश्न उठेको छ।

त्यसैले आलोचकहरू अहिले बालेनको पुरानो भनाइ सम्झाइरहेका छन्-‘सुदूर अब दूर छैन’ भन्ने आश्वासन व्यवहारमा भने फेरि सुदूरपश्चिमलाई नै दूर बनाउने खालको त भएन ?