नवलपरासी । पश्चिम नवलपरासीको प्रतापपुर गाउँपालिका–७ का वडा अध्यक्ष हरेन्द्र यादव पक्राउ परेका छन्।

जग्गासम्बन्धी विषयमा किर्ते र ठगी गरेको आरोपमा इलाका प्रहरी कार्यालय बेलटारीमा जाहेरी परेपछि यादवलाई प्रहरीले पक्राउ गरेको हो।

जिल्ला प्रहरी कार्यालय पश्चिम नवलपरासीका सूचना अधिकारी डीएसपी मदन थापाका अनुसार जाहेरीपछि जिल्ला अदालतबाट पक्राउ पुर्जी लिएर प्रहरीले यादवविरुद्ध अनुसन्धान अघि बढाएको थियो।

तर पक्राउ पर्नुअघि यादवले आफूलाई पक्राउ नगर्न माग गर्दै उच्च अदालत तुलसीपुर, बुटवल इजलासबाट अल्पकालीन अन्तरिम आदेश लिएका थिए।

शुक्रबार उच्च अदालत बुटवल इजलासले उक्त आदेशलाई निरन्तरता दिन आवश्यक नरहेको ठहर गरेपछि यादवलाई पक्राउ गर्ने बाटो खुलेको थियो।

त्यसपछि जिल्ला प्रहरी कार्यालयबाट खटिएको टोलीले उनलाई दाउन्नेबाट पक्राउ गरेको डीएसपी थापाले जानकारी दिए।

‘आज बिदा भइसकेकाले अदालत खुलेपछि म्याद थपका लागि उपस्थित गराइन्छ,’ डीएसपी थापाले भने।

यादवमाथि लागेको आरोपबारे प्रहरीले थप अनुसन्धान अघि बढाउने जनाएको छ।