काठमाडौं। महिला, बालबालिका, लैङ्गिक तथा यौनिक अल्पसङ्ख्यक तथा सामाजिक सुरक्षा मन्त्रालयले राष्ट्रिय दलित आयोगबाट सिफारिस गरिएका दलित समुदायका थरहरूको सूची सार्वजनिक गर्दै सरोकारवालासँग राय, सुझाव तथा प्रतिक्रिया माग गरेको छ।

राष्ट्रिय दलित आयोगले प्रचलित कानुनी व्यवस्थाअनुसार दलित समुदायका थर सूचीकरणका लागि सिफारिससहितको विवरण मन्त्रालयमा पठाएको थियो। उक्त सिफारिसलाई अन्तिम रूप दिनुअघि सम्बन्धित समुदाय, व्यक्ति, संघसंस्था, विज्ञ तथा आमनागरिकको धारणा बुझ्ने उद्देश्यले मन्त्रालयले सूची सार्वजनिक गरेको जनाएको छ।

मन्त्रिपरिषद्बाट थर सूचीकरणसम्बन्धी निर्णय हुनुअघि आवश्यक सुझाव संकलन गर्ने उद्देश्यले मन्त्री सीता बादीको निर्देशनमा आयोगबाट सिफारिस भएका थरहरूको विवरण सार्वजनिक गरिएको मन्त्रालयले जनाएको छ।

मन्त्रालयले आफ्नो वेबसाइटमा सूची राख्दै त्यसमा कुनै त्रुटि, सुझाव वा आपत्ति भए दुई दिनभित्र जानकारी गराउन अनुरोध गरेको छ।

राय तथा सुझाव मन्त्रालयको इमेलसँगै महिला, बालबालिका, लैङ्गिक तथा यौनिक अल्पसङ्ख्यक तथा सामाजिक सुरक्षामन्त्री बादी र उनको सचिवालयको इमेलमा पठाउन सकिने व्यवस्था गरिएको छ।

मन्त्रालयका अनुसार प्राप्त सुझाव तथा प्रतिक्रियामाथि आवश्यक अध्ययन गरिनेछ। त्यसबाट प्राप्त निष्कर्षलाई थर सूचीकरणसम्बन्धी आगामी प्रक्रियामा समेटेर मन्त्रिपरिषद्मा प्रस्ताव लैजाने तयारी गरिएको छ।