काठमाडौं । नेपाली कांग्रेसका सभापति गगन थापाले पार्टीको मूल विचार, आत्मा र आदर्शलाई जोगाउँदै कांग्रेसलाई एकताबद्ध बनाउने बताएका छन्।

सर्वोच्च अदालतको पछिल्लो आदेशपछि कांग्रेसभित्र एकताका लागि संस्थापन पक्षमाथि दबाब बढिरहेका बेला थापाले पार्टीको आत्मा र विचार समाप्त पारेर गरिने एकता आफूहरूलाई स्वीकार्य नहुने बताएका हुन्।

भक्तपुरमा आयोजित कार्यक्रममा बोल्दै थापाले विशेष महाधिवेशनबाट पारित पार्टीको विचार र निर्णयलाई कमजोर नबनाई कांग्रेसलाई थप एकताबद्ध बनाउने बताए। उनका अनुसार पार्टीभित्र देखिएको विवाद समाधानका लागि नेतृत्वले सबै पक्षसँग संवाद अघि बढाउनेछ।

थापाले यसै विषयमा छलफल गर्न शुक्रबार नै पदाधिकारी बैठक बस्ने र त्यसपछि बस्ने केन्द्रीय कार्यसमिति बैठकबाट आवश्यक निर्णय लिइने जानकारी दिए।

उनले कांग्रेसलाई सबै कार्यकर्ताले गर्व गर्न सक्ने पार्टीका रूपमा विकास गर्ने दाबी पनि गरे। कांग्रेसप्रतिको आफ्नो राजनीतिक आस्था खुलेर व्यक्त गर्न सक्ने र पार्टीको सदस्य हुनुमा गर्व गर्ने वातावरण निर्माण गर्न आफू प्रतिबद्ध रहेको उनको भनाइ थियो।

‘कसैले कांग्रेसको झोले होस् भन्दा छाती पिटेर म कांग्रेसको झोले हुँ भन्न सक्ने गर्विलो कांग्रेस बनाउँछौँ,’ थापाले भने।

पार्टीभित्रको पछिल्लो विवादका बीच थापाको यस्तो अभिव्यक्तिलाई कांग्रेसमा एकता कायम गर्ने प्रयाससँगै विशेष महाधिवेशनबाट अघि सारिएको राजनीतिक दिशालाई निरन्तरता दिने संकेतका रूपमा हेरिएको छ।