काठमाडौं। प्यूठानको स्वर्गद्वारी नगरपालिका-९ जुडापाटस्थित माडी खोलाको किनारमा आज पाँच जनाको शव फेला परेको छ।

जिल्ला प्रहरी कार्यालय प्यूठानका अनुसार ती शव रोल्पाको थबाङ गाउँपालिका-५ बोटलबारा क्षेत्रमा गएराति पहिरोमा परी बेपत्ता भएकाहरूको हुनसक्ने प्रारम्भिक अनुमान गरिएको छ।

प्यूठानमा मानिस हराएको वा पहिरो गएको घटना नरहेकाले माथिल्लो क्षेत्र रोल्पाबाट बाढीले शव बगाएर ल्याएको हुनसक्ने जिल्ला प्रहरी कार्यालय प्यूठानका प्रमुख डीएसपी नरहरि अधिकारीले बताए।

फेला परेका शवका तस्वीर रोल्पा प्रहरीलाई पठाइएको छ। तस्वीरका आधारमा शवको पहिचान गर्ने प्रयास भइरहेको प्रहरीले जनाएको छ।

रोल्पा प्रहरीका अनुसार लुंगी खोला माडी खोलामा मिसिने भएकाले थबाङमा पहिरोमा परेका मानिस तथा शव बाढीले बगाएर प्यूठानसम्म ल्याएको हुनसक्ने सम्भावना छ।

रोल्पाको थबाङ-५ बोटलबारा क्षेत्रमा पहिरोले घर तथा गोठ पुरिँदा तीन जनाको मृत्यु भएको, दुई जना गम्भीर घाइते भएको र नौ जना बेपत्ता रहेको प्रहरीले जनाएको छ।

प्यूठानमा भेटिएका पाँच शव रोल्पाको पहिरोमा बेपत्ता नौ जनामध्येका हुन् वा होइनन् भन्नेबारे पहिचान तथा थप अनुसन्धान भइरहेको प्रहरीले जनाएको छ।