काठमाडौं। नेपाली कांग्रेसका नेता डा. शशांक कोइरालाले पार्टीको नेतृत्वका विषयमा देखिएको विवादलाई लिएर शेरबहादुर देउवा नै वैधानिक सभापति रहेको बताएका छन् ।

बिहीबार स्वदेश फर्किएका देउवालाई त्रिभुवन अन्तर्राष्ट्रिय विमानस्थलमा स्वागत गर्न पुगेका कोइरालाले सभापतिको जिम्मेवारीमाथि कुनै कानुनी रोकावट नरहेको दाबी गरे ।

उनले देउवाको नेतृत्वमा कांग्रेसलाई थप सुदृढ गर्दै पार्टीभित्रको विभाजन अन्त्य गर्नुपर्ने आवश्यकता औँल्याए ।

कोइरालाका अनुसार देउवाको सभापतित्वलाई रोक्ने कुनै अदालतको आदेश नरहेकाले कांग्रेसको आधिकारिक नेतृत्व उनकै हातमा रहेको छ ।

पार्टीबाट अलग्गिएको पक्षसँग पनि संवाद र सहकार्य गर्दै सबैलाई पुनः एउटै मूलधारमा ल्याउनुपर्ने उनको धारणा छ ।

‘सानेपा कांग्रेस’ भनेर चिनिएको अलग्गिएको समूहलाई पनि पार्टीभित्र फर्किन आग्रह गर्दै कोइरालाले उनीहरू आउने वा नआउने निर्णय सम्बन्धित पक्षकै भएको बताए । तर, आफूहरूको प्राथमिकता भने कांग्रेसलाई एकताबद्ध बनाउनु रहेको उनले स्पष्ट पारे ।

उनले कांग्रेसभित्र देखिएका असन्तुष्टि र मतभेदलाई आपसी संवादबाट समाधान गर्नुपर्नेमा जोड दिए । लामो समयसम्म पार्टी विभाजन र विवादलाई निरन्तरता दिनुभन्दा सबै पक्षले लचकता अपनाएर साझा ठाउँ खोज्नुपर्ने उनको भनाइ छ ।

कोइरालाले कांग्रेसलाई बलियो बनाउन सबै नेता तथा कार्यकर्ता एकजुट हुनुपर्ने बताए।