काठमाडौं। कर्णाली प्रदेशमा हुने दसौँ राष्ट्रिय खेलकुद प्रतियोगिताको मिति फेरि परिवर्तन भएको छ।

राष्ट्रिय खेलकुद परिषद् (राखेप) को १२५औँ बोर्ड बैठकले आगामी मंसिर १६ देखि २९ गतेसम्म प्रतियोगिता आयोजना गर्ने निर्णय गरेको हो।

यसअघि तोकिएका मिति कार्यान्वयन हुन नसकेपछि प्रतियोगिताको मिति चौथोपटक सारिएको हो। सुरुमा २०८१ मंसिर २ देखि ९ गतेसम्म प्रतियोगिता गर्ने निर्णय भएको थियो। पूर्वाधार तयारी पूरा नभएपछि मिति चैत २३ देखि ३० गतेसम्म सारियो। त्यसपछि २०८२ जेठ ३ देखि १० गते र पुनः फागुन १ देखि ७ गतेसम्मका लागि मिति तोकिएको थियो।

फागुनको मिति पनि कार्यान्वयन हुन नसकेपछि राखेपले अहिले नयाँ मिति तय गरेको हो। यसअघि फागुनको मितिलाई मन्त्रिपरिषद्ले समेत स्वीकृति दिएको थियो।

कर्णालीमा प्रतियोगिता आयोजनाका लागि वीरेन्द्रनगरस्थित प्रदेश रंगशालासहित विभिन्न खेलस्थल निर्माण तथा स्तरोन्नतिको काम भइरहेको छ। पूर्वाधार, बजेट र व्यवस्थापनको तयारी समयमै पूरा गर्नु यसपटक पनि मुख्य चुनौती बनेको छ।

राखेपले दसौँ राष्ट्रिय खेलकुदमा ३५ खेलका ४१९ स्पर्धा सञ्चालन गर्ने तयारी गरेको छ। नयाँ मिति तय भएसँगै निर्धारित समयमै प्रतियोगिता सम्पन्न गर्ने जिम्मेवारी अब राखेप र कर्णाली प्रदेश सरकारमाथि परेको छ।