काठमाडौं। अस्ट्रेलियामा १६ वर्षभन्दा कम उमेरका बालबालिकालाई सामाजिक सञ्जाल प्रयोगमा प्रतिबन्ध लगाएपछि मेटाले साढे ७ लाखभन्दा बढी अकाउन्ट हटाएको छ।

मेटाका अनुसार गत डिसेम्बरदेखि जुनसम्म १६ वर्षभन्दा कम उमेरका अस्ट्रेलियालीले सञ्चालन गरेको आशंका गरिएका ७ लाख ५० हजारभन्दा बढी अकाउन्ट हटाइएको हो।

तीमध्ये इन्स्टाग्रामका ४ लाख ६२ हजार र फेसबुकका २ लाख ९४ हजार अकाउन्ट छन्।

बालबालिका तथा किशोरकिशोरीको मानसिक र शारीरिक स्वास्थ्यमा सामाजिक सञ्जालको प्रभावलाई ध्यानमा राख्दै अस्ट्रेलियाले १६ वर्षमुनिका प्रयोगकर्तामाथि प्रतिबन्ध लगाएको हो।

तर प्रतिबन्ध लागू भएको सुरुआती तीन महिनामै ८० प्रतिशतभन्दा बढी नाबालकले सामाजिक सञ्जाल प्रयोग गरिरहेको सरकारी तथ्यांक र स्वतन्त्र अध्ययनले देखाएको छ।

मेटाले कानुन कार्यान्वयनका लागि एआईको प्रयोग गरिरहेको जनाएको छ। प्रयोगकर्ताको प्रोफाइलमा उल्लेख भएका जन्मदिन, विद्यालयको कक्षा तथा अन्य गतिविधिका आधारमा सम्भावित नाबालकका अकाउन्ट पहिचान गर्ने गरिएको कम्पनीले जनाएको छ।

हटाइएका अकाउन्ट पुनः खोल्ने प्रयास रोक्न पनि थप प्रविधि प्रयोग भइरहेको मेटाको भनाइ छ।

यसैबीच, नियम उल्लंघन गर्ने सामाजिक सञ्जाल कम्पनीलाई अधिकतम ९ करोड ९० लाख अस्ट्रेलियाली डलरसम्म जरिबाना गर्ने तथा नियामक निकायको अधिकार बढाउने प्रस्ताव सरकारले अघि सारेको छ।