काठमाडौं। सर्वोच्च अदालतको नयाँ भवनस्थित अभिलेख शाखामा गएराति आगलागी भएको छ।

राति करिब साढे १२ बजे भुइँ तलामा रहेको अभिलेख शाखाबाट धुवाँ र आगो देखिएपछि तत्काल दमकल बोलाएर आगो नियन्त्रणमा लिइएको सर्वोच्च प्रशासनका एक कर्मचारीले बताएका छन्।

प्रारम्भिक जानकारीअनुसार विद्युत् सर्ट भएर आगलागी भएको अनुमान गरिएको छ। काठमाडौं महानगरपालिकाको दमकलले तत्काल घटनास्थल पुगेर आगो नियन्त्रणमा लिएको ती कर्मचारीले जनआस्थालाई बताए।

आगलागीका कारण अभिलेख शाखामा रहेका तीनवटा स्टिल दराजमा राखिएका प्रमाण तथा मिसिल जलेका छन्। कुन-कुन मुद्दा तथा अभिलेखमा क्षति पुगेको हो भन्ने विवरण भने खुलाइएको छैन।

यस घटनाले पछिल्लो समय संवेदनशील बनेका न्यायिक अभिलेखको सुरक्षामाथि समेत प्रश्न उठाएको छ। विशेषगरी जेनजी आन्दोलनका क्रममा भएका घटना, त्यससँग सम्बन्धित उजुरी, प्रमाण तथा मुद्दाका अभिलेख सुरक्षित छन् कि छैनन् भन्ने विषयमा चासो बढेको छ।

यद्यपि, आगलागीमा जेनजी आन्दोलनसँग सम्बन्धित कुनै मिसिल वा प्रमाण नै जलेको हो भन्ने पुष्टि भइसकेको छैन। जलेका अभिलेखको पहिचान र क्षतिको विवरण खुलेपछि मात्रै त्यसबारे स्पष्ट हुने प्रशासनले जनाएको छ।

‘राति साढे १२ बजेतिर अभिलेख शाखाबाट आगलागी भएको जानकारी आयो। प्रारम्भिक रूपमा विद्युत् सर्ट भएको देखिएको छ। दमकल तत्काल बोलाएर आगो नियन्त्रणमा लिइयो,’ ती कर्मचारीले भने, ‘तीनवटा स्टिल दराजमा राखिएका प्रमाण तथा मिसिल जलेका छन्।’

आगलागीको कारण र क्षतिको थप विवरणबारे अनुसन्धान भइरहेको छ।