काठमाडाैं। देउवा पक्षले छुट्टै महाधिवेशनको तयारी थालेपछि नेपाली कांग्रेसले केन्द्रीय अनुशासन समितिको बैठक बोलाएको छ। पार्टीको केन्द्रीय कार्यालय सानेपामा बस्ने गरी बैठक बोलाइएको हो।

कांग्रेस स्रोतका अनुसार बैठक दिउँसो २ बजेबाट सुरु हुनेछ। बैठकमा समितिका सदस्यहरूको उपस्थितिका लागि निर्देशानुसार अनुरोध गरिएको उनले बताए।

पूर्वसभापति शेरबहादुर देउवा समूहले मंसिरमा समानान्तर महाधिवेशन गर्ने कार्यतालिका ल्याउने तयारी गरिरहेका बेला कांग्रेसले अनुशासन समितिको बैठक बोलाएपछि पार्टीभित्र थप राजनीतिक तरंग सिर्जना भएको छ।

देउवा पक्षले समानान्तर महाधिवेशनको तयारी अघि बढाइरहेका बेला सभापति गगन थापा पक्षले त्यसलाई कसरी लिन्छ र अनुशासन समितिमार्फत के कस्तो कदम चाल्छ भन्ने चासो बढेको छ।

देउवा पक्षका गतिविधिलाई पार्टीको विधान र अनुशासनविपरीत ठहर गर्दै कारबाहीको प्रक्रिया अघि बढाउने सम्भावनासमेत चर्चामा आएको छ। यद्यपि, अनुशासन समितिको बैठकमा कुन-कुन विषयमा छलफल हुन्छ र कस्तो निर्णय हुन्छ भन्ने स्पष्ट भइसकेको छैन।

यसैबीच कांग्रेसले शनिबार बस्ने गरी केन्द्रीय कार्यसम्पादन समिति बैठकसमेत बोलाएको छ। अनुशासन समिति र कार्यसम्पादन समिति बैठक लगातार बोलाइनुलाई कांग्रेसभित्र बढ्दै गएको विवाद व्यवस्थापन गर्ने प्रयासका रूपमा हेरिएको छ।