काठमाडौं । कांग्रेसमा विवाद चर्किँदै जाँदा पूर्वउपसभापति पूर्णबहादुर खड्का भने देउवा क्याम्पबाट विस्तारै बाहिरिएका छन् । उनी अहिले गुट जोगाउनेभन्दा पार्टी जोगाउनेतिर लागेका छन् ।

पूर्वसभापति शेरबहादुर देउवा पक्षले समानान्तर महाधिवेशनको तयारी गरिरहेका बेला खड्का त्यसका बैठकमा देखिन छाडेका छन् । बरु आफूनिकट नेताहरू भेला गरेर पार्टी विभाजन रोक्ने उपाय खोजिरहेका छन् ।

शनिबार २० भन्दा बढी नेतासँग छलफल गरेका खड्काको सन्देश स्पष्ट थियो, दुईवटा महाधिवेशन नगरौँ, मिलेर अघि बढौँ ।

बैठकमा सहभागी नेता रामहरि खतिवडाका अनुसार खड्का पार्टी फुटाउने पक्षमा छैनन् । अर्का नेता श्याम घिमिरेका अनुसार खड्काले आफू कांग्रेसमै रहने र फुटेको पार्टीमा नजाने धारणा राखेका छन् ।

खड्काले सभापति गगन थापासँग संवाद गरेर विवाद मिलाउने पहलसमेत गरिरहेका छन्। देउवा पक्षसँग नजिक रहेका नेताहरूलाई समेत आफू अब चुनदेवीमा हुने बैठकमा सहभागी नहुने जानकारी गराइसकेको बताइएको छ ।

शशांक कोइरालालाई पूर्वसंस्थापन पक्षले संयोजक बनाएपछि खड्का थप असन्तुष्ट बनेको नेताहरूको भनाइ छ ।

विवाद समाधानका लागि यसअघि तयार पारिएको ८ बुँदे सहमतिको आधारमा फेरि अघि बढ्न सकिने खड्का पक्षको धारणा छ ।

उक्त सहमतिमा १४औँ महाधिवेशनबाट निर्वाचित केन्द्रीय सदस्यलाई समेट्ने र गगन थापाको नेतृत्वमा पार्टीका विभिन्न समिति गठन गर्नेलगायतका विषय थिए ।

उता नेता शेखर कोइराला पनि सबै पक्षलाई समेटेर कांग्रेसलाई एकढिक्का बनाउने पक्षमा देखिएका छन् । उनले गगन थापालाई सभापति मानेर १५औँ महाधिवेशन सहमतिमै सम्पन्न गर्नुपर्ने बताउँदै आएका छन्।

आइतबार थापा र कोइरालाबीच भेटवार्तासमेत भएको छ । कोइरालाको सचिवालयका अनुसार देश, लोकतन्त्र र राष्ट्रियता अप्ठ्यारो अवस्थामा रहेकाले कांग्रेसलाई एकताबद्ध बनाउने विषयमा छलफल भएको थियो । थापाले पनि आफू पार्टी एकताको पक्षमा रहेको बताएका थिए ।

पूर्वसभापति शेरबहादुर देउवा भने आफू पक्षले अदालतबाट आधिकारिकता पाउने दाबी गर्दै आएका छन् । विदेशबाट फर्किएपछि उनले पार्टीसम्बन्धी जिम्मेवारी शशांक कोइरालालाई दिएको र नेताहरूलाई उनैसँग समन्वय गर्न भन्ने गरेको बताइएको छ ।

देउवा पक्षका नेता रमेश लेखकले भने गगन थापालाई सभापति मानेर पार्टी एकता गर्न आफूहरू तयार रहेको बताएका छन् । तर महाधिवेशन प्रक्रिया नरोकिए पार्टी विभाजन हुन सक्ने उनको चेतावनी छ ।

यसले कांग्रेसभित्र अहिले दुई बाटो देखाएको छ । देउवा पक्ष अदालत र समानान्तर महाधिवेशनतिर छ । खड्का, शेखरलगायतका नेताहरू भने सहमतिबाट पार्टी जोगाउने कसरतमा छन् ।

कांग्रेसमा अहिले गुटभन्दा ठूलो प्रश्न पार्टी रहने कि नरहने भन्ने बनेको छ।