काठमाडौं। नेपालमा राष्ट्रिय शोक मनाइरहेका बेला अस्ट्रेलियाका प्रधानमन्त्री एन्थोनी अल्बानीजले बाढीबाट प्रभावित नेपालीप्रति ऐक्यबद्धता जनाएका छन् ।

अस्ट्रेलियाली संसदमा सम्बोधन गर्दै प्रधानमन्त्री अल्बानीजले विनाशकारी बाढीका कारण प्रभावित नेपालीप्रति आफ्नो देशका तर्फबाट दुःख व्यक्त गरेका हुन् ।

उनले विपद्मा ज्यान गुमाएकाप्रति श्रद्धाञ्जली व्यक्त गर्दै शोकमा रहेका परिवार तथा बाढीबाट प्रभावित सबै नेपालीसँग अस्ट्रेलियाको साथ रहेको बताए ।

‘नेपालको राष्ट्रिय शोकका दिन हाम्रो विचार नेपालका जनता र विनाशकारी बाढीबाट प्रभावित सबैसँग छ,’ उनले संसदमा भने ।

भोटेकोशी क्षेत्रमा आएको बाढी तथा पहिरोबाट ठूलो जनधनको क्षति भएपछि नेपाल सरकारले राष्ट्रिय शोक घोषणा गरेको अवस्थामा अस्ट्रेलियाली प्रधानमन्त्रीको यस्तो अभिव्यक्ति आएको हो ।