काठमाडौं । नेपाली कांग्रेसका सांसद चन्द्रमोहन यादवले रास्वपा सांसद अमरेशकुमार सिंहले लगाएको गम्भीर आरोपबारे सरकारले संसद्मा जवाफ दिनुपर्ने माग गरेका छन्।

प्रतिनिधिसभाको बैठकमा बोल्दै यादवले सत्ता पक्षकै सांसद सिंहले प्रधानमन्त्रीको सचिवालयले सम्पत्ति शुद्धीकरण विभागका महानिर्देशक (डीजी) लाई बोलाएर कन्चटमा पेस्तोल तेर्स्याएको आरोप लगाएको भन्दै त्यसबारे सरकारको धारणा सार्वजनिक हुनुपर्ने बताए।

यादवले सिंहको अभिव्यक्तिलाई सामान्य रूपमा लिन नहुने भन्दै लोकतान्त्रिक व्यवस्थामा धम्की र भयको वातावरण स्वीकार्य नहुने बताए।

‘सत्ता पक्षकै सांसदबाट आएको वक्तव्यबारे ध्यानाकर्षण गराउन चाहन्छु। कहीँ सुन्नमा आएको छ, कन्चटमै पेस्तोल राखेर थर्काउने कुरा आएको छ। कहीँ कुरा आएको छ, प्रश्न गर्दाखेरि धम्की आउँदो रहेछ,’ उनले भने, ‘यो कुरा असाध्यै अलोकतान्त्रिक कुरा हो। यसमा सरकारको के जवाफ छ, हामी सुन्न आतुर छौँ।’

सांसद यादवले लोकतन्त्रमा राजनीतिक असहमति र प्रश्न उठाउने अधिकार सुरक्षित हुनुपर्ने बताए। कुनै पनि व्यक्तिलाई प्रश्न गरेकै आधारमा धम्की दिने वा त्रासमा पार्ने काम भए त्यसबारे राज्यले गम्भीर भएर जवाफ दिनुपर्ने उनको भनाइ थियो।

उनले लोकतान्त्रिक शासन व्यवस्थामा हिंसा, धम्की र भयको कुनै स्थान नरहेको समेत स्पष्ट पारे।