काठमाडौं । राष्ट्रिय स्वतन्त्र पार्टी (रास्वपा) का सांसद धनञ्जय रेग्मीले संयुक्त राष्ट्रसंघको महासभामा नेपालले जलवायु परिवर्तनको मुद्दा बलियो तथ्य र वैज्ञानिक प्रमाणसहित उठाउनुपर्ने बताएका छन्।

बुधबार प्रतिनिधिसभा बैठकमा बोल्दै रेग्मीले प्रधानमन्त्रीको आसन्न महासभा भ्रमणलाई नेपालको जलवायु संकटबारे विश्वको ध्यानाकर्षण गराउने अवसरका रूपमा उपयोग गर्नुपर्ने बताए। उनका अनुसार नेपालले क्षतिपूर्ति माग्ने शैलीमा मात्र सीमित नभई प्रमाण र तथ्यांकका आधारमा अन्तर्राष्ट्रिय बहसलाई नेतृत्व गर्ने गरी आफ्नो धारणा प्रस्तुत गर्नुपर्छ।

उनले जलवायु परिवर्तनका कारण नेपालका हिमताल र हिमनदीमा परेको प्रभावबारे पर्याप्त वैज्ञानिक प्रमाण रहेको बताए। हिन्दुकुश हिमालय क्षेत्रमा तापक्रम बढ्दै गएको र हिमाली क्षेत्रमा हिउँ पग्लने क्रम तीव्र बनेको विषय विभिन्न अन्तर्राष्ट्रिय अनुसन्धान तथा ‘पियर–रिभ्युड’ अध्ययनले समेत देखाएको उनको भनाइ थियो।

रेग्मीले नेपालका विश्वविद्यालय, अनुसन्धान संस्था तथा इसिमोडलगायतका निकायमा उपलब्ध वैज्ञानिक तथ्यांकलाई एकीकृत गर्नुपर्नेमा जोड दिए।

उनका अनुसार विभिन्न निकायमा छरिएर रहेका अनुसन्धान र तथ्यांकलाई एउटै राष्ट्रिय आधार बनाएर संयुक्त राष्ट्रसंघलगायत अन्तर्राष्ट्रिय मञ्चमा प्रस्तुत गर्न सके नेपालले जलवायु परिवर्तनको असरबारे थप प्रभावकारी ढंगले विश्व समुदायको ध्यान तान्न सक्छ।

उनले सरकारलाई जलवायु परिवर्तनसम्बन्धी राष्ट्रिय तथ्यांक र अनुसन्धानलाई एकीकृत गर्दै स्पष्ट र प्रमाणमा आधारित धारणा निर्माण गर्न आग्रह गरे।