काठमाडौं । प्रधानमन्त्री बालेन शाहको नेतृत्वमा नेपाली प्रतिनिधिमण्डल संयुक्त राष्ट्रसंघको महासभामा सहभागी हुन अर्को साता संयुक्त राज्य अमेरिका जाने भएको छ।

बिहीबार सिंहदरबारमा बसेको अन्तर्राष्ट्रिय सम्बन्ध तथा पर्यटन समितिको बैठकमा परराष्ट्रमन्त्री शिशिर खनालले प्रधानमन्त्रीको नेतृत्वमा आफू सहितको टोली महासभामा सहभागी हुन अमेरिका प्रस्थान गर्ने जानकारी दिएका हुन्।

‘राष्ट्रसंघको महासभा अर्को हप्तादेखि सुरु हुँदैछ र नेपालको तर्फबाट सम्माननीय प्रधानमन्त्रीज्यूको नेतृत्वमा म लगायत एउटा प्रतिनिधिमण्डल अर्को हप्ता संयुक्त राष्ट्रसंघको महासभामा सहभागी हुन नेपालबाट प्रस्थान गर्दैछ’, मन्त्री खनालले भने।

महासभामा नेपालको राष्ट्रिय हित, अन्तर्राष्ट्रिय सम्बन्ध तथा समसामयिक विश्व परिस्थितिसँग सम्बन्धित विषय उठाउने तयारी रहेको उनले बताए।

समितिको बैठकमा संयुक्त राष्ट्रसंघको महासभामा नेपालको सहभागितासँगै जलवायु परिवर्तनका विषयमा पनि विज्ञहरूसँग छलफल भएको थियो।

छलफलमा नेपालले जलवायु परिवर्तनका कारण भोगिरहेको जोखिम, जलवायु न्याय, अन्तर्राष्ट्रिय सहयोग र जलवायु वित्तलगायत विषयमा विज्ञहरूले धारणा राखेका थिए।

अन्तर्राष्ट्रिय मञ्चमा नेपालले जलवायु परिवर्तनका मुद्दा प्रभावकारी रूपमा उठाउनुपर्नेमा बैठकमा जोड दिइएको थियो।

परराष्ट्रमन्त्री खनालले महासभामा नेपालको सहभागिता मुलुकका कूटनीतिक प्राथमिकता र अन्तर्राष्ट्रिय सरोकार प्रस्तुत गर्ने महत्त्वपूर्ण अवसर हुने बताए।