काठमाडौं । नेपाली कांग्रेसको १५औँ महाधिवेशनका लागि नेता रामहरि खतिवडा ओखलढुंगाबाट केन्द्रीय महाधिवेशन प्रतिनिधिमा निर्वाचित भएका छन्। खुलातर्फ उम्मेदवारी दिएका खतिवडाले १ हजार मत प्राप्त गरेको समाचार सार्वजनिक भएको छ। ।

ओखलढुंगामा बिहीबार सम्पन्न मतगणनाबाट खतिवडा प्रतिनिधि चयन भएका हुन्। उनको पक्षमा आएको मतलाई जिल्लामा उनको संगठनात्मक पकड र कार्यकर्तामाझको समर्थनसँग जोडेर हेरिएको छ।

पार्टीभित्र स्पष्ट अभिव्यक्ति दिने नेताका रूपमा चिनिने खतिवडाले महाधिवेशनको प्रतिनिधि छनोटमा खुलातर्फ प्रतिस्पर्धा गरेका थिए। उनले अघि सार्दै आएको ‘विचारमा स्पष्टता, नेतृत्वमा नवीनता, संगठनमा एकता र जनतामा प्रतिबद्धता’ भन्ने नारालाई पनि उनका समर्थकले जोड दिएका छन्।

महाधिवेशन प्रतिनिधिमा निर्वाचित भएसँगै खतिवडाले अब पार्टीको केन्द्रीय महाधिवेशनमा ओखलढुंगाको प्रतिनिधित्व गर्नेछन्।

कांग्रेसभित्र नेतृत्व र नीतिगत बहस चलिरहेका बेला प्रतिनिधि छनोटको यो नतिजाले उनको आगामी भूमिकाबारे चासो बढाएको छ।