Author: nepal one

मुगु १२ फागुन -छायाँनाथ रारा नगरपालिकाले सदरमुकाम गमगढी बजारमा सार्वजनिक जग्गा मिचेर बनाईएका अवैध संरचना भत्काउन सुरु गरेको छ ।

पटक पटक सुचना जारी गदै सार्वजनिक जग्गा मिचेर बनाईएका संरचना हटाउन आग्रह गरेको भएपनि स्थानीयले अटेरी गरेपछि शुक्रबार छायाँनाथ रारा नगरपालिकाले आफै अवैध संरचना भत्काउन थालेको हो ।

गत असोज १४ गते पहिलो ३५ दिने सुचना जारी गदै गमगढी बजार साघुँरो भएको र सार्वजानिक जग्गा मिचेर बनाईएका संरचना घर,भरयाङ्ग, बार्दली,रेलिङ्ग,लगायत हटाउन आग्रह गरेको थियो । त्यस पछि अर्को सुचना मंसिर ९ गते र अर्को सुचना पुस २१ गते लगत्तै सर्वदलिय बैठक बसेर रेखाकंन गरेर सार्वजनिक जग्गा बनाईएका संरचनाको चिन्ह लगाउने काम गरिनुका साथै अवैध संरचना हटाउन अर्काे सुचना जारी गरिएकाे थियाे ।

फागुन ५ गते अन्तिम सुचना जारी गरेर अवैध संरचना हटाउन आग्रह गरेको भएपनि स्थानीयले कुनै चासो नराखी अटेरी गरेपछि नगरपालिका बाध्य भएर आफै संरचना भत्काउन लागेको छायाँनाथ रारा नगरपालिकाका नगर प्रमुुख बिष्णु कुमार भामले बताए ।

उनका अनुसार यो कार्य कुनै आग्रह पुर्वग्रह नभई सुन्दर गमगढी बजार बनाउनको लागी हो । सार्वजनिक जग्गा मिचेर बनाईका संरचना हटाउन बारम्बार आग्रह गर्दा पनि सुनुवाई नभएपछि स्थानीय प्रशासनको सहयोगमा आफै नगरपालिकाले अवैध संरचना भत्काउने काम गरेको बताए । अहिलेलाई सार्वजानिक जग्गा मिचेर बनाईएका संरचनाहरु घर,भ¥याङ्ग, बार्दली,रेलिङ्ग,लगायतका भत्काउने कार्य भएको छ ।

‘घरहरुको लागी पुन सम्बन्धित घरमा १५ दिने सुचना टाँस गरेका छौ’ उनले भने । १५ दिनसम्म पनि सार्वजनिक जग्गामा भएका घर नहटाएमा नगरपालिकाले डोजर लगाएर भत्काउने नगर प्रमुख भामको भनाई छ । गमगढी बजारमा सार्वजानिक जग्गा मिचिर बनाईएका संरचना नगरपालिकाले भत्काउन थालेपछि स्थानीय खुसि भएका छन ।

साघुँरो बजार, बजारमा आवत जावत गर्न समस्या र आगलागीको जोखिम लगायत एम्बुलेन्स दमकल बजारमा लिन समस्या हुने बजारमा सार्वजनिक जग्गा मिचेर बनाएका संरचना भत्काउन थालेपछि बजारको सडक फराकिलो भएको र अब सहज हुने भएको स्थानीय दिपेश जंङ्ग शाहीले बताए ।

यो कार्य अघिल्लो  कार्यकालमा पनि सार्वजनिक जग्गामा भएका संरचना हटाउने भन्दै रेखाकंन गरिएको थियो तर त्यो सम्भव हुन सकेकाे थिएन । 

शुक्रबार अदालत चोककाे छत्त रावलको घर बाट अवैध संरचना भत्काउन गरिएको र पहिलो दिन कृष्ण चोकसम्म भत्काउने कार्य भएको छ । भोली तल्लो बजारमा रहेका अवैध संरचना भत्काउने छायाँनाथ रारा नगरपालिकाले जनाएको छ ।
 

काठमाडौं । लामो समयदेखि रोकिएको दोस्रो चरणको चक्रपथ विस्तार अन्तर्गत कलंकीदेखि महाराजगन्जसम्मको सडक विस्तार हुने भएको छ। यसअघि चिनियाँ पक्षले साइट क्लियरेन्स नभएको भन्दै चक्रपथ विस्तारको काम अघि बढ्न सकेको थिएन।

भौतिक पूर्वाधार तथा यातायात मन्त्रालयले दोस्रो चरणको चक्रपथ विस्तारको काम चिनियाँ पक्षले छिट्टै गर्ने प्रतिवद्धता गरेको बताएको छ। यो खण्डको सडक महाराजगन्ज, स्वयम्भू लगायतका केही स्थानमा बाहेक अन्य ठाउँमा कुनै अवरोध छैन। चिनियाँ पक्ष भने साइट क्लिरेन्स नभएको भन्दै काम अघि बढाउन तयार भएको छैन।

उपप्रधान, भौतिक पूर्वाधार तथा यातायात मन्त्री नारायणकाजी श्रेष्ठले बिहीबार कलंकी महाराजगन्ज सडक खण्डको अनुगमन गर्दै दोस्रो चरणको चक्रपथ विस्तारको काम छिट्टै सुरु हुने बताएका छन्। ‘दोस्रो चरणको चक्रपथ विस्तार गर्ने सम्बन्धमा नेपालका लागि चीनको राजदूतज्यूसँग पटक पटक छलफल भइसकेको छ,’ उनले भने ‘हामी दूवै पक्षबीच छिटोभन्दा छिटो अघि बढाउने सहमति भएको छ।’ मन्त्री श्रेष्ठले सो खण्डमा केही स्थानमा रहेका विवादहरू सल्टाएर विस्तारको काम अघि बढ्ने सहमति भएको दाबी पनि गरे। ‘अहिले स्वयम्भू स्तुपा क्षेत्रको डिजाइन परिवर्तन गर्नुपर्ने देखिएको छ,’ उनले भने ‘अहिले यहाँ केही समस्या देखिएका छन्। त्यो समस्या समाधान गरेर अघि बढ्नेछौं।’

मन्त्री श्रेष्ठले लामो समयदेखि विभिन्न खालका विवादको कारणले दोस्रो चरणको चक्रपथ विस्तारको काम हुन नसकेको बताए। ‘नेपालका लागि चीनको राजदूतज्यू र हाम्राबीच छलफल गरेर छिटोभन्दा छिटो अघि बढाउने सहमति भएको छ,’ उनले भने ‘चिनियाँ पक्ष र हाम्रो मन्त्रालय दुवैपक्षबाट अध्ययनको काम पनि भइसकेको छ। अहिले यहाँ केही समस्या देखिएका छन्। त्यो समस्या समाधान गरेर अघि बढ्नेछौं।’ मन्त्री श्रेष्ठले ठूला खालका समस्याहरू लगभग समाधान भइसकेकाले अब विस्तारको कामले गति लिने दाबी गरे। ‘हामीले चीन सरकारसँग सकेसम्म महाराजगन्जदेखि धोवीखोलासम्मको सडक विस्तार गर्नका लागि अनुरोध गरेका छौं। चिनियाँ पक्षले भने महाराजगन्जसम्म मात्रै विस्तार गर्ने कुरा गरिरहेका छन्।’ यो समाचार नागरिक दैनिकमा छ ।

काठमाडौ, १० फागुन । युद्धग्रस्त मुलक युक्रेनमा अहिले पनि नेपाली जाने गरेको पाइएको छ।

युक्रेन मामिलासमेत हेर्दै आएको जमर्नीको बर्लिनमा रहेको नेपाली दूतावासका अनुसार अहिले पनि नेपालीहरू विभिन्न माध्यमबाट युक्रेन पुग्ने गरेका छन्।

त्यहाँबाट सिमावर्ती युरोपेली मुलकमा प्रवेश गर्न पाइने आशामा नेपालीहरू जोखिम मोलेर युक्रेन पसिरहेको दूतावासको भनाइ छ।

विगत १ वर्षदेखि रुस र युक्रेनबीच युद्ध चलिरहेको छ। युद्ध चर्किएसँगै युक्रेनमा रहेका ६ सयभन्दा बढी नेपालीलाई गैरआवासीय नेपाली संघ तथा विभिन्न अन्तर्राष्ट्रिय संघ–संस्थाको समन्वयमा दूतावासले त्यत्तिबेला उद्धार गरेको थियो।

युद्ध चर्किएपछि त्यत्तिबेला उनीहरूलाई युक्रेनसँग जोडिएका छिमेकी मुलुकहरूले मानवीयताको हिसावले सुरक्षित रहन प्रवेश दिएका थिए। तीमध्ये कतिपय नेपाल फर्किएका थिए भने केही नेपालीहरू पोल्याण्ड, पोर्चुगललगायतका मुलकमा बसेका थिए।

तर, अहिले भने यस्तो सुविधा छिमेकी मुलुकहरूले दिएका छैनन्।

दूतावासका अनुसार गत जनवरी तेस्रो सातादेखि युक्रेनसँग सिमाना जोडिएका युरोपेली मुलकहरूले युक्रेनमा रहेका नेपालीलगायत अन्य देशका नागरिकहरुलाई आफ्नो देश प्रवेश गर्न नदिने घोषणा गरिसकेका छन्।

तर, नेपालीहरू भने पहिला जस्तै युरोप प्रवेश गर्न पाइने आशामा जोखिम मोलेर युद्धग्रस्त मुलुक युक्रेन पुग्ने गरेका छन्। विभिन्न प्रलोभनमा परी नेपाली युक्रेन छिर्न थालेको दूतावासको भनाइ छ।

‘यस्तो विषम परिस्थितिमा पनि विभिन्न प्रलोभनमा परी वा स्वेच्छाले यूक्रेनको यस्तो जटिल अवस्थाबाट फाइदा लिइ युरोपका अन्य मुलुकमा प्रवेश गरी पलायन हुने मनासायका साथ अझ पनि केही नेपालीहरू गैर–कानूनी रुपमा युक्रेन प्रवेश गरिराखेको बुझिएको छ,’ बर्लिनस्थित नेपाली दूतावासको भनाइ छ।

गैरकानूनी तरवरले युक्रेन प्रवेश गर्ने नेपालीलाई त्यहाँबाट सिमावर्ती देशमा जान सम्बन्धित मुलकको युक्रेनस्थित दूतावास वा सिमानामा रहेको अध्यगामनबाट भिसाको आवश्यकता पर्दछ। तर, गत जनवरीदेखि यी प्रक्रिया सबै बन्द भइसकेका छन्।

‘युक्रेनमा हाल अन्तर्राष्ट्रिय उडान समेत स्थगित भएको सन्दर्भमा यस राजदूतावासबाट यात्रा अनुमति जारी भइ त्यहाँबाट बहिर्गमन हुनसक्ने अवस्था पनि नभएकोले कुनैपनि नेपाली नागरिकले कसैको प्रलोभनमा परी वा स्वेच्छाले कुनै पनि माध्यमबाट युक्रेन प्रवेश नगर्न यस राजदूतावास सबैलाई अनुरोध गर्दछ,’ दूतावासले विज्ञप्तिमार्फत भनेको छ।

दूतावासले गैरकानूनी तरवरले युक्रेन प्रवेश नर्गन चेतावनी दिएको छ। जोखिम मोलेर युक्रेन पुगि समस्यामा परे त्यस्ता व्यक्तिलाई कुनै पनि सहयोग गर्न नसकिने दूतावासले जनाएको छ।

‘यस्तो अवस्थामा पनि यो सूचनालाई वेवास्ता गरी गैर कानूनी रुपमा युक्रेन प्रवेश गरेमा त्यसबाट उत्पन्न हुने असहज परिस्थितिका लागि सम्बन्धित व्यक्ति स्वयं जिम्मेवार हुने जानकारी गराइन्छ,’ दूतावासले भनेको छ।