Tag: हर्क साम्पाङ

काठमाडौं । श्रम संस्कृति पार्टीभित्र आन्तरिक अनुशासनको विषय फेरि चर्चामा आएको छ । पार्टीका केन्द्रीय अध्यक्ष हर्क साम्पाङले पार्टीका उपाध्यक्ष डा. मित्र परियारलाई कारबाही गरेका छन् । शनिबार बुटवलको ट्राफिक चोकमा आयोजित पार्टीको सभामा परियारले दिएको अभिव्यक्ति र त्यसपछिको व्यवहारले पार्टीको आचारसंहिता उल्लङ्घन गरेको ठहर गर्दै कारबाही गरिएको अध्यक्ष साम्पाङले सामाजिक सञ्जालमार्फत जानकारी गराएका हुन् ।

साम्पाङले सार्वजनिक गरेको स्टाटसमा श्रम संस्कृतिमा पदका आधारमा ठूलो–सानो नहुने उल्लेख गर्दै कार्यक्रमकै क्रममा आयोजक र सहसंयोजकप्रति गरिएको व्यवहार आपत्तिजनक भएको जनाएका छन् । ‘श्रम संस्कृतिमा कोही सानो, कोही ठूलो हुँदैन । आज उपाध्यक्षले बुटवलका आयोजकलाई गरेको अपमान र सहसंयोजकलाई बोलेको अपमानजन्य बोलीका कारण आचारसंहिता उल्लङ्घन भएकोले नसच्चिएसम्म कारबाही गरिएको जानकारी गराउँदछु’, उनले लेखेका छन् । तर, कारबाहीको स्वरूप र अवधि भने स्पष्ट खुलाइएको छैन ।

घटना शनिबार बुटवलमा पार्टीले आयोजना गरेको सभाको क्रममा भएको हो । स्वागत मन्तव्यपछि प्रमुख अतिथिका रूपमा अध्यक्ष साम्पाङले सम्बोधन गरेपछि टीका लगाउने र पार्टी प्रवेशको कार्यक्रम सुरु गरिएको थियो । यही क्रममा उद्घोषकले उपाध्यक्ष डा. परियारलाई सम्बोधनका लागि आमन्त्रण गरेका थिए । तर, उनको बोलाइ सुरु हुँदा अधिकांश सहभागीको ध्यान अध्यक्ष साम्पाङसँग टीका लगाउने र फोटो खिच्ने कार्यक्रममा केन्द्रित भएपछि परियार असन्तुष्ट देखिएका थिए।

सम्बोधनकै क्रममा परियारले आयोजक समितिप्रति सार्वजनिक रूपमा असन्तोष व्यक्त गर्दै आफूलाई केन्द्रीय उपाध्यक्षका हैसियतले बोल्न पाउनु पर्ने बताएका थिए। ‘कार्यक्रम आयोजकहरूले अलिकति मिस्टेक गर्नु भएको छ । ध्यान यता, मन यता हुन सक्दैन । म केन्द्रीय उपाध्यक्ष हुँ, म पनि बोल्न पाउनु पर्छ । ध्यान अन्त मोडिनु हुँदैन’, भन्दै उनले कार्यक्रम रोक्न समेत आग्रह गरेका थिए । उनले आफू दुई दिनदेखि बुटवलमा रहेर मेहनत गरेको उल्लेख गर्दै कार्यक्रमको सेड्युल नमिलेको अनुभूति भएको बताए र आयोजक कमिटीले आत्मसमीक्षा गर्नुपर्ने धारणा राखेका थिए ।

सभापछि समेत परियारले आयोजक कमिटीका सहसंयोजकप्रति अपशब्द प्रयोग गरेको जानकारी आएपछि अध्यक्ष साम्पाङले यसलाई गम्भीर रूपमा लिँदै आचारसंहिता उल्लङ्घन भएको निष्कर्ष निकालेका हुन् । पार्टी नेतृत्वका अनुसार श्रम संस्कृति पार्टीमा पदभन्दा व्यवहार र अनुशासनलाई प्राथमिकता दिइन्छ, र त्यसविपरीत जाने जो–कोहीलाई कारबाही गरिने नीति कायम रहेको छ ।

यो पहिलो पटक होइन, श्रम संस्कृति पार्टीका उपाध्यक्ष कारबाहीमा परेको । यसअघि विष्फोटक पदार्थसम्बन्धी मुद्दामा पक्राउ परेका पार्टीका अर्का उपाध्यक्ष राजकुमार तामाङ (देवराज लामा) लाई पनि पार्टीले कारबाही गरिसकेको छ । लगातार उपाध्यक्ष तहका नेताहरू कारबाहीमा पर्न थालेपछि पार्टीभित्रको आन्तरिक अनुशासन, नेतृत्व शैली र व्यवस्थापनबारे राजनीतिक वृत्तमा चासो बढेको छ ।

काठमाडौं । श्रम संस्कृति पार्टीका सभापति एवं धरान उपमहानगरपालिकाका मेयर हर्कराज राई (साम्पाङ) ले आफ्नो पार्टीले चुनाव जितेर सरकार गठन गर्ने दाबी गरेका छन् । काठमाडौंको सिफलमा आयोजित सभालाई सम्बोधन गर्दै साम्पाङले यस्तो दावी गरेका हुन् । ‘जेनजी आन्दोलनमा भएको तर नबोलिएको एउटा सत्य के हो भने हाम्रो विचार अनुसारको राज्य पनि हुनुपर्छ भन्ने हो । त्यसकारण हामीले घोषणापत्रमै लेखेका छौं,’ साम्पाङले भने, ‘हामीले नै जित्छौं, कुनै शंका छ ? हामीले नै जित्छौं, हामीले नै सरकार गठन गर्छौं ।’

आफूहरूको नेतृत्वको सरकारले जेनजीको माग सम्बोधन गर्न आयोग बनाउने पनि उनले बताए । ‘त्यसपछि जेनजीको एउटा आयोग बनाउँछौं । जेनजीले के भन्न चाहेको छ भन्ने बुझ्नुपर्‍यो नि । ८० वर्षको पुस्ता र हिजो अस्तीको युवापुस्ताले भनेको कुरा बुझ्छ ?,’ साम्पाङले भनेका छन् । यो देशको अग्रगामी छलाङ मार्ने योजना आफ्नो पार्टीले ल्याउने उनको जिकिर थियो ।

‘क्रान्तिकारी विकास आजको आवश्यकता’
अध्यक्ष हर्क साम्पाङले क्रान्तीकारी विकास आजको आवश्यकता भएको बताएका छन् । उनले देशको संस्कृतिसँग युवालाई जोड्दै मुलुकलाई आर्थिक समुन्नतिको बाटोमा डो¥याउने अभियानमा गोलवद्ध हुन समेत सबै युवाहरुलाई आग्रह गरे । आफ्नो पार्टीले विदेशी ऋणको भरमा बाटो र पुल बनाउने कुरा नगर्ने उल्लेख गदै उनले श्रमदानमार्फत मुलुकलाई विकास र समृद्धिको दिशामा लैजाने कुरामा प्रतिबद्ध रहेको पनि बताए ।

उनले भने, ‘श्रम संस्कृति पार्टीले यो देशको संस्कृतिसँग युवालाई जोड्न चाहन्छ । यो पार्टीले स्वाधीनताको कुरा गर्छ । विदेशी ऋणको भरमा बाटो र पुल बनाउनु पर्छ भन्दैन । यही देशको स्रोत र श्रमलाई परिचालन गरेर मुलुकलाई आर्थिक उन्नतिको दिशामा अगाडि बढाउन चाहन्छ । देशलाई विदेशी चलखेलको रणमैदान हुनबाट बचाउन निस्केको अभियान हो श्रम संस्कृति पार्टी । पुराना पार्टीहरुले काम गर्छन् भनेर पर्खिन सकिँदैन । सबै जना यो अभियान जोडिनुहोस् । क्रान्तिकारी विकास आजको आवश्यकता हो । ठेकेदारले एक वर्षमा गर्ने काम श्रमदानमार्फत एक महिनामै गर्न सकिन्छ भने किन क्रान्तीकारी विकास नगर्ने ?’ उनले पुराना राजनीतिक दलहरुले विकास गर्छन् भन्दै पर्खिने स्थिति नरहेको पनि बताए । उनले पुराना राजनीतिक दलहरुले मुलुक र जनताको हितमा काम गर्न नसकेको टिप्पणी गर्दै अगामी निर्वाचनमा श्रम संस्कृति पार्टीमा जोडिन सबैलाई आह्वान समेत गरे ।

काठमाडौं । केहि समयअघिसम्म काठमाडौंका मेयर बालेन (बालेन्द्र) शाहमाथि लगातार खनिंदै आएका धरान उपमहानगरपालिकाका मेयर तथा श्रम संस्कृति पार्टीका अध्यक्ष हर्क साम्पाङ राई पछिल्लो समय ऊर्जामन्त्री कुलमान घिसिङमाथि निरन्तर प्रहारमा उत्रिएका छन् । आउँदो चुनावमा आफ्नो पार्टीलाई बहुमत ल्याउन नदिन देशी–विदेशी तत्वले कुलमानलाई प्रयोग गरेको उनको दाबी छ । केहि दिनअघि फेसबुक लाइभमा बोल्दै साम्पाङले नेपालमा काम गर्ने मान्छे सत्तामा नपुगुन् र देश दरिद्र भइराखोस् भनेर षडयन्त्र भइराखेको आरोप लगाएका छन् ।

त्यसका बाबजुद आफ्नो श्रम संस्कृति पार्टीले बहुमत ल्याएर छोड्ने उनको दावी छ । साम्पाङले घिसिङलाई चुनौती दिँदै भनेका छन्, ‘तपाई मविरुद्ध यसरी प्रयोग भइराख्नु भयो भने हाम्रो श्रम संस्कृति पार्टीले साइड लगाउँछ वा नाघेर जान्छ । त्यो हुनुभन्दा पहिले बचेखुचेको छविलाई बचाउनुस् र मन्त्रीको काममा केन्द्रित हुनुस् ।’ पछिल्ला दिनमा विभिन्न अन्तर्वार्ता र सामाजिक सञ्जालमार्फत साम्पाङले कुलमानको भूमिकाप्रति शंका व्यक्त गर्दै आफूले देखेका ‘रहस्यमय गतिविधि’ बारे खुलेर टिप्पणी र संगीन आरोप लगाएका छन् ।

एक अन्तर्वार्तामा साम्पाङले कुलमान घिसिङलाई कुनै शक्ति वा समूहबाट ‘परिचालित गरेको’ आभास मिलिरहेको बताएका छन् । उनले घिसिङको चरित्रलाई ‘मिस्टेरियस’ अर्थात् रहस्यमयको रूपमा चित्रण गर्दै यस्ता व्यक्तिहरू ‘खतरनाक हुन सक्छन्’ भनेका छन् । हालै घोषणा भएको उज्यालो नेपाल पार्टीमा कुलमानले आफूलाई मूल आधारको जस्तो देखाएको तर नामावलीमा उनको औपचारिक हैसियत नै नरहेको उल्लेख गर्दै साम्पाङले कटाक्ष गरेका थिए ।

उनले भनेका छन्, ‘पार्टीका कागजात हेर्दा उहाँ आधिकारिक रूपमा कतै पनि छैनन्, तर घोषणा कार्यक्रममै गएर आफू नै सबैथोक हो भन्ने शैलीमा प्रस्तुत हुनुभयो । यस्तो दोहोरो व्यवहारले उल्झन देखाउँछ ।’ उनले यस्तो अवस्थालाई भविष्यले पुष्टि गर्ने दाबी समेत गरेका छन् । घिसिङ ‘कसैबाट प्रयोगमा पर्न सक्ने’ सम्भावना समेत साम्पाङले औंल्याएका छन् । एमसीसी कार्यान्वयनमा कुलमानको भूमिका रहेको आरोप लगाउँदै, ‘यस्तो व्यक्तिबाट राष्ट्रिय हितको रक्षा हुने अपेक्षा गर्न कठिन’ भएको टिप्पणी पनि उनले गरेका छन् । उनले भनेका छन्, ‘कुलमान बोर्डिङ पास जस्तो हुन्-कुनै चरणमा आवश्यक तर अन्ततः औचित्यहीन ।’

साम्पाङले वर्तमान सरकार विदेशी शक्तिको समर्थनमा बनेको आफ्नो पुरानो टिप्पणी अहिले सही सावित हुँदै गएको दाबी समेत गरेका छन् । जेन–जेड पुस्तामै पनि निराशा बढेको दावी गर्दै उनले आफ्नो विश्लेषण ‘क्रमशः स्पष्ट हुँदै गएको’ बताएका छन् । श्रम संस्कृति पार्टी दर्तापछि संगठन विस्तार अभियानमा रमाइरहेका साम्पाङ देशका विभिन्न जिल्लामा सभाहरू गर्दैछन् । आफूलाई भावी प्रधानमन्त्रीको रूपमा प्रस्तुत गर्दै उनले जनमत निर्माणमा तीव्रता बढाएका छन् । यद्यपि, यी कार्यक्रमबीच उनले फेरि एक पटक ऊर्जामन्त्री कुलमानमाथि नयाँ आरोप जोडिदिए ।

फेसबुकमा लेख्दै साम्पाङले भनेका छन्, ‘आफू जहाँ–जहाँ सभाका लागि पुग्यो, त्यही–त्यही स्थानमा विद्युत् लाइन काटिएको छ । भोजपुर, ताप्लेजुङदेखि संखुवासभासम्म आफ्ना गतिविधि गर्दा पटक–पटक बत्ती नबलेको उल्लेख गर्दै उनले यसका लागि प्रत्यक्ष रूपमा घिसिङलाई दोष लगाए । ‘अब हेटौंडा जाँदैछु, त्यहाँ पनि काटिदिनु है’, भन्दै उनले व्यङ्ग्यात्मक शैलीमै कोपिला मारे । उनका यी अभिव्यक्तिले राष्ट्रिय राजनीति र ऊर्जा क्षेत्रमा फेरि एक पटक तरङ्ग पैदा गरेको छ । घिसिङले साम्पाङका आरोपबारे कुनै प्रतिक्रिया नदिए पनि, साम्पाङको निरन्तर टिप्पणीले दुईबीचको तिक्तता झनै सतहमा आएको देखिन्छ ।

हर्क साम्पाङका मन्त्री घिसिङमाथि मुख्य १० आरोप

–कुलमान घिसिङ कुनै शक्तिबाट ‘परिचालित’ छन् ।
–रहस्यमय (मिस्टेरियस) र दोहोरो चरित्रका व्यक्ति भएको आरोप ।
–उज्यालो नेपाल पार्टीमा औपचारिक जिम्मेवारी नभए पनि आफू नै सबैथोक हो भन्ने शैलीमा प्रस्तुत हुँदा भ्रम फैलाएको टिप्पणी ।
–कुलमानलाई कसैले प्रयोग गरिरहेको हुन सक्ने दाबी ।
–एमसीसी ल्याउन कुलमानको हात रहेको आरोप, जुन राष्ट्रियताको पक्षमा हुन नसक्ने दाबी ।
–राष्ट्रिय हितको रक्षा गर्न सक्षम छैनन् भन्ने ठोकुवा ।
–घोषणा सभामा आफ्नो हैसियतभन्दा बढी दाबी गर्दै जनता भ्रमित गरेको आरोप ।
–राजनीतिक रूपमा अनिश्चित, कन्फ्युज्ड व्यवहार देखाएको टिप्पणी ।
–ऊर्जामन्त्री पदको दुरुपयोग गरी आफू जहाँ जाँदा पनि त्यहींको ‘लाइन काटिदिएको’ आरोप ।
–आफ्नो राजनीतिक कार्यक्रममा विद्युत् अवरुद्ध गरेर ‘बाधा सिर्जना’ गरेको आरोप ।

भोजपुर । श्रम, संस्कृति पार्टीका अध्यक्ष तथा धरान उपमहानगरपालिकाका प्रमुख हर्क साम्पाङले सबैले मिलेर देश परिवर्तन गर्न आवश्यक रहेको बताएका छन् ।

स्थानीय टुँडिखेलमा आज आयोजित कार्यकर्ता भेला तथा सङ्गठन विस्तार कार्यक्रमलाई सम्बोधन गर्दै अध्यक्ष साम्पाङले श्रम बिना परिवर्तन सम्भव नभएकाले सबै शक्ति मिल्न जरुरी रहेको धारणा राखे । देशको जनशक्ति नै युवाशक्ति भएकाले युवाको सही प्रयोग हुन आवश्यक रहेकामा उनले जोड दिए ।

‘युवाले आफूहरु कसरी र कोबाट परिचालन भइरहेका छाै‌ भन्ने बुझ्न आवश्यक छ’, अध्यक्ष साम्पाङले भने । युवाले अब श्रम गरेर पसिना बगाउन आवश्यक रहेको उनको भनाइ थियो । अध्यक्ष साम्पाङले अबका दिनमा सबै सच्चिन आवश्यक रहेको बताए ।

काठमाडौं । धरान उपमहानगरपालिकाका मेयर हर्क साम्पाङले ऊर्जामन्त्री कुलमान घिसिङलाई आफ्नो मन्त्रालय सम्हाल्न आग्रह गरेका छन्। सामाजिक सञ्जालमार्फत सुझाव दिँदै साम्पाङले सरकारमा गइसकेपछि फेरि अस्थिर बन्नु नहुने भन्दै अधुरो अपूरो छोडेर ननिस्कन आग्रह गरेका हुन् ।

उनले त्यो कोर्ष पूरा गर्न सुझाउँदै हर्कले भने, ‘कुल्मानजी… मन्त्रालय सम्हाल्नुस् ! सरकार ढल्ला फेरि ! पछि श्रम संस्कृतिमा स्वागत गर्नेछु !’ ‘नजानु सरकारमा गइसकेपछि फेरि अस्थिर बन्नु हुँदैन अधुरो अपूरो छोडेर ननिस्कनु ! त्यो कोर्ष पूरा गर्नुस्,’ मेयर साम्पाङले उल्लेख गरेका छन् ।

काठमाडौं । धरान उपमहानगरपालिकाका प्रमुख हर्क साम्पाङ राईले आफू काठमाडौं आउन लागेको जानकारी दिएका छन् । सामाजिक सञ्जालमार्फत यसबारे जानकारी दिँदै उनले लेखेका छन्, ‘काठमाडौं छोटो समयका लागि आउँदैछु ।’ उनले काठमाडौं किन आउँदैछन् भन्नेबारे कुनै जानकारी दिएका छैनन् ।

उनी जेनजी प्रदर्शनपछि बनेको सुशीला कार्की सरकारको निरन्तर विरोध गर्दै आएका छन् । गत भदौ २३ र २४ गतेको दुई दिने प्रदर्शनपछि तत्कालीन केपी शर्मा ओली सरकार ढलेपछि उनी नेतृत्व लिन काठमाडौं आएका थिए। तर उनी प्रधानमन्त्री बन्न पाएनन् । त्यसपछि धरान फर्किएका उनले कार्की सरकार विदेशीको इसारामा बनेको आरोप लगाउँदै आएका छन् । उनले पटक पटक प्रधानमन्त्री र केही मन्त्रीहरूको राजीनामा समेत मागेका छन् । कार्की सरकारले पूर्णता पाउन सकेको छैन । यसबिच नयाँ मन्त्रीसहित मन्त्रीपरिषद् विस्तार गर्ने चर्चा भइरहेको छ ।

काठमाडौं । धरान उपमहानगरपालिकाका मेयर हर्क साम्पाङ राईले ‘किसानझैं फोहोर’ लेखेकोमा काठमाडौं महानगरपालिकाका मेयर बालेन साहको आलोचना गरेका छन् । माटोलाई फोहर ठान्नेविरुद्ध माटोको टीका लगाएर देश बचाउन आफू आएको उनले बताएका छन्। ‘किसानझैं फोहोर लेख्नुभन्दा बरू हर्क साम्पाङझैं फोहोर लेख्नु नि !’ राईले सामाजिक सञ्जालमा लेखेका छन्, ‘माटोलाई फोहोर ठान्नेहरूविरुद्ध हामी आएका छौँ माटोको टीका लगाएर देश बचाउन !’

काठमाडौं । धरान उपमहानगरपालिकाका मेयर हर्क साम्पाङले शिक्षा, विज्ञान तथा प्रविधिमन्त्री महावीर पुन र ऊर्जा, जलस्रोत तथा सिँचाइमन्त्री कुलमान घिसिङको राजीनामा माग गरेका छन् । बिहीबार आफ्नो आधिकारिक सामाजिक सञ्जाल मार्फत मेयर साम्पाङले पुन र घिसिङलाई पदबाट राजीनामा दिएर ‘बदनामी’ बाट बच्न सुझाव दिएका हुन् ।

उनले लेखेका छन्, ‘तत्काल राजीनामा दिएर बदमानीदेखि बचून् महावीर र कुलमान !’ यसपछि, साम्पाङले काठमाडौंमा पक्राउ परेका अभियन्ता डा. निकोलस भुसालको तत्काल रिहाइको माग गर्दै वर्तमान सरकारको वैधतामाथि प्रश्न उठाएका छन् । उनले सरकारलाई विदेशी दलाल र वैधताविहीनको संज्ञा दिएका थिए ।

काठमाडौँ । धरान उपमहानगरपालिकाका मेयर हर्क साम्पाङले वैधता बिनाको सरकारलाई प्रहरीले पनि नटेर्ने रहेछ भन्दै कटाक्ष गरेका छन्। सामाजिक सञ्जाल फेसबुक पेजमा लेख्दै उनले यस्तो टिप्पणी गरेका हुन् ।

पूर्व प्रधानमन्त्री केपी शर्मा ओली र पूर्व गृहमन्त्री रमेश लेखकविरुद्ध जेनजी आन्दोलनका घाइते परिवारबाट आएको जाहेरी प्रहरीले दर्ता गरेर अनुसन्धान अघि नबढाइ पूर्व न्यायाधीश गौरीबहादुर कार्की नेतृत्वको न्यायिक जाँचबुझ आयोगलाई पठाएपछि मेयर साम्पाङको यस्तो भनाई बाहिर आएको हो । मेयर साम्पाङले लगातार सुशीला कार्की नेतृत्वको अन्तरिम सरकारको वैधता र चरित्रका विषयमा प्रश्न उठाउँदै आइरहेका छन् ।

काठमाडौं । धरान उपमहानगरपलिकाका मेयर हर्क साम्पाङले जेनजी प्रतिनिधिहरुप्रति कडा आरोप लगाएका छन् । सामाजिक सञ्जाल फेसबुकमा एक स्टाटस लेख्दै उनले विदेशी दलालका टोली आफूलाई जेनजी प्रतिनिधि भन्दै हिँडेको भन्दै आरोप लगाएका हुन् ।

फेसबुकमा उनले लेखेका छन्, ‘विदेशी दलालका टोली आफूलाई जेनजी प्रतिनिधि भन्दै हिँडेका छन् । यिनीहरु विदेशी पैसामा पालित पोषित हुन् । सबैले बहिष्कार गरौं ।’

भदौ २३ र २४ गते भएको जेनजी आन्दोलनका क्रममा ७४ जना नेपालीले ज्यान गुमाएका छन् । जेनजी आन्दोलनपछि पूर्व प्रधानन्यायाधी सुशीला कार्कीको नेतृत्वमा अन्तरिम सरकार गठन भएको छ । उक्त सरकारले फागुनमा प्रतिनिधिसभाको निर्वाचन गर्ने निर्णय गरिसकेको छ ।

तर, जेनजीहरु भने आफ्नो माग पूरा नभएको भन्दै आन्दोलन गर्ने चेतावनी दिइरहेका छन् । कार्कीको नेतृत्वका सरकार निर्माणमा हामी नेपाल नामक संस्थाका प्रमुख सुदन गुरुङले आफ्नो प्रभाव जमाएका थिए । जेनजी आन्दोलन अघि कुनै भूमिकामा नदेखिएका गुरुङ सरकार निर्माणमा भने एकाएक अगाडि आएका थिए ।

काठमाडौं । धरान उपमहानगरपलिकाका मेयर हर्क साम्पाङले वर्तमान अन्तरिम सरकारप्रति गम्भिर आरोप लगाएका छन् । सामाजिक सञ्जाल फेसबुकमा स्टाटस लेख्दैै उनले विदेशीले बनाएको सरकार कता हरायो ? भन्दै प्रश्न गरेका हुन् ।

फेसबुकमा उनले लेखेका छन्, ‘७४ जनालाई बलिचढाएर विदेशी दलालले बनाएको सरकार कता हरायो ?’ भदौ २३ र २४ गते भएको जेनजी आन्दोलनका क्रममा ७४ जना नेपालीले ज्यान गुमाएका छन् ।

जेनजी आन्दोलनपछि पूर्व प्रधानन्यायाधी सुशीला कार्कीको नेतृत्वमा अन्तरिम सरकार गठन भएको छ । उक्त सरकारले फागुनमा प्रतिनिधिसभाको निर्वाचन गर्ने निर्णय गसिकेको छ । तर, जेनजीहरु भने आफ्नो माग पूरा नभएको भन्दै आन्दोलनको चेतावनी दिइरहेका छन् ।

काठमाडौं । धरान उपमहानगरपालिकाका प्रमुख हर्क साम्पाङले दल दर्ताका लागि निर्वाचन आयोगमा निवेदन दिएका छन् । उनले असोज ७ गते नै आयोगमा दल दर्ताका लागि निवेदन दिएका जनाइएको छ ।

‘उहाँले दल दर्ताका लागि निवेदन दिनु भएको छ । पार्टीको नाम श्रम संस्कृति पार्टी र अध्यक्ष उहाँ आफैं रहने गरी निवेदन प्राप्त भएको छ’ स्रोतले सुनायो । दल दर्ताका लागि निवेदन प्राप्त भइसकेको र अध्ययनकै क्रममा रहेको जनाइएको छ ।

‘दल दर्ताका लागि निवेदन आए पनि अध्ययनकै क्रममा छ, दश बिदा लगत्तै उक्त निवेदनबारे अध्ययन गरेर दर्ता प्रक्रिया अघि बढाइनेछ’ स्रोतले भन्यो । धरानको खानेपानी मुद्दामा संघर्ष गरेका साम्पाङ सोही मुद्दाका कारण स्वतन्त्र रुपमा मेयर पद जितेका थिए । मेयर भएपछि उनले धरानमा श्रमदान गरी पानीको व्यवस्थापन गरेका छन् ।

आयोगले प्रमाण नपुगेको, विवरण सच्याउनुपर्ने भए सुधार तथा परिमार्जनका लागि सम्बन्धित दल दर्ताका लागि निवेदन दिनेलाई पत्राचार गर्नेछ। प्रक्रिया पूरा गरेर निवेदन पेश भएको भए दल दर्ता गर्नेछ । निवेदन दिएको ४५ दिनभित्र आयोगले दल दर्ता गरिसक्नुपर्ने कानूनी व्यवस्था छ ।

उनी जेनजी आन्दोलनपछि देशकै नेतृत्व लिन भन्दै काठमाडौं आएका थिए । तर, उनको नाममा सहमति जुटेन । साम्पाङले मन्त्री बन्न भारतीय दूतावास जानुपर्ने रहेछ भन्दै आफू त्यसको लागि तयार नरहेको सामाजिक सञ्जालमा उल्लेख गरेका थिए ।

काठमाडौं । धरान उपमहानगरपालिकाका मेयर हर्क साम्पाङले आज (शनिबार) विहानै प्रधानमन्त्री सुशीला कार्कीको राजीनामा माग गरेका छन् ।

सामाजिक सञ्जालमा पुनः सक्रिय भएका उनले कार्कीको राजीनामा मागसँगै उर्जामन्त्री कुलमान घिसिङको विरोध समेत गरेका छन् । मोबाइल हराएका कारण केही समय निष्क्रिय रहेका उनले अर्को डिभाइसबाट सामाजिक सञ्जालमा पुनः सक्रियता देखाउँदै एकपछि अर्को स्ट्याटस लेखेका छन् ।

यसबीचमा उनले प्रधानमन्त्री सुशीला कार्कीको राजीनामा मागदेखि ऊर्जा मन्त्री कुलमान घिसिङको निर्णयको विरोध गरेका छन् । जेन–जीका माग पूरा गर्न नसकेको भन्दै मेयर साम्पाङले प्रधानमन्त्री कार्कीको राजीनामा मागेका हुन् ।

उनले लेखेका छन्, ‘सुशीलाजी, तपाईंले जेन–जीको मर्मअनुसार काम गर्न सक्नु भएन । राजीनामा दिनुस् । म गर्छु उनीहरूको माग एक–एक गरेर पूरा !’ आफू नेतृत्व लिन र जेन–जीका माग पूरा गर्न सक्षम भएको उनको दाबी छ । उनले अर्को स्ट्याटस लेखेका छन्, ‘अहिलेको सरकारले भ्रष्टाचार छानबिन गर्छ भने सबैभन्दा पहिले प्रधानमन्त्री र मन्त्रीहरू आफैंबाट सुरु गर्नुपर्छ । बिना स्रोतको सम्पत्ति राखेको पाइए पुष्टि भए आफैंलाई हतकडी लगाउने हिम्मत गर्नुपर्छ अनि मात्र अरूतिर लम्कँदा राम्रो होला ।’

त्यस्तै, ऊर्जा मन्त्रीले नेपाल विद्युत् प्राधिकरणका तत्कालीन निर्देशक हितेन्द्र शाक्यलाई हटाएको कुराको पनि उनले विरोध गरेका छन् । उनले लेखेका छन्, ‘हितेन्द्रलाई निकाल्नु भन्दा पनि देश र जनताको लागि कजाउनु पर्ने थियो । यस्तो प्रतिशोधको भावनाले निको गर्दैन । हामी बदला होइन बदलावको पक्षमा उभिनु पर्छ । गलत चाल कुलमानजी ।’ अर्को प्रसङ्गमा उनले मेरो मोबाइल खोल्ने बित्तिकै चोर्ने व्यक्ति पक्राउ पर्ने चेतावनी दिँदै तत्काल फिर्ता गर्न अनुरोध पनि गरेका छन् ।

काठमाडौं । धरान उपमहानगरपालिकाका मेयर हर्क साम्पाङ राईले फेरि एक पटक काठमाडौंका मेयर बालेन शाह लक्षित कटाक्ष गरेका छन्। उनले विदेशी दलालको स्टाटस बेमौसमी गीत मात्रै भएको भन्दै कटाक्ष गरेका हुन् ।

हर्कले देशको अवस्था खरानी बनाएर एम्बुलेन्स र छात्रवृत्तिका कुरा गरेर मोड्न खोजेको आरोप समेत लगाएका छन् । ‘विदेशी दलालको स्टाटस बेमौसमी गीत मात्रै हो !’ उनले सामाजिक सञ्जालमा लेखेका छन्, ’देशको अवस्था खरानी बनाएर घरी एम्बुलेन्स रे, घरी छात्रवृत्ति रे, भो अब जति नै डाइभर्ट गर्न खोजे पनि नेपालीले चिनिसक्यो विदेशी दलाल भनेर !’

काठमाडौं । धरान उपमहानगरपालिकाका मेयर हर्क साम्पाङ जेनजी आन्दोलनपछि सिर्जित परिस्थिति सम्झिँदै धुरुधुरु रोएका छन् । प्रधानमन्त्री बन्ने उद्देश्यले काठमाडौं आएका उनी मन्त्री पनि नबनि रित्तो हात घर फर्किएका थिए ।
काठमाडौंबाट धरान पुगेपछि पत्रकारहरूको भेटमा विदेशीले देशलाई टेकओभर गर्न सक्ने खतरा रहेको भन्दै उनी भक्कानिएका हुन् । धरानमा केही सञ्चारकर्मीसँग कुरा गर्दै साम्पाङले आफूलाई खानेपानी र श्रम मन्त्री दिइएको भए पनि स्वीकार नगरेको दावी गरेका छन् ।

केही पत्रकारले ‘यतिखेर नरुनुस्’ भनेर समेत सम्झाएका थिए । त्यसपछि सम्हालिँदै हर्कले भने, ‘विदेशीले यतिखेर टेकओभर गर्न सक्ने सम्भावना छ । सबै नेताहरू भागाभाग छन् । कोही रक्ताम्य छन् । कोही बागमतीमा कुटाइ खाँदै गरेको देखिन्छ ।’

हर्कले भने, ‘पार्टीहरूका कार्यालय तहसनहस छन् । अब को शक्ति आउने हो देशमा ? कोही छैन । कसले त्यस्तो ग¥यो, कसरी त्यस्तो भयो भन्ने कसैलाई थाहा नभएको स्थिति छ । अनि मलाई सबै मान्छेले काठमाडौै जानु भने । त्यत्रो मान्छेले भनिसकेपछि मलाई लाग्यो, म त देश बनाउन आएको मान्छे हो ।’

उनले भने, ‘मलाई हिम्मत हारेको मान्छे भन्नुहुन्छ तपाईँहरू… म जतिको हिम्मतिलो मान्छे यो देशमा कोही पनि छैन ।’ आफूलाई शुभचिन्तकहरूले काठमाडौंमा गोली लाग्न सक्छ भन्दा पनि ‘लाग्छ भने लागोस्’ भनेर गएको बताए । नेता भनाउँदाहरूले सबै लुकिरहेको वेलामा यो देश बचाउनलाई आफूले आगोमा हामफाल्ने निर्णय गरेको समेत सुनाए । यही कारण धरानबाट पाँच सय किलोमिटर टाढा काठमाडौं पुगेको बताए ।

आफूलाई प्रधानमन्त्री बनाउने विषयमा काठमाडौंमा धेरै छलफल भए पनि निकास ननिस्किएको बताए । ‘यो अटेरी छ, हाम्रो लाइनमा आउँदैन भन्ने कुरा भएछ । मिनिस्टर हुनलाई सहमति गर्नुपर्ने रे । त्यस्तो खालको मान्छे होइन म । अरूलाई ढोगेर पद पाउँ भन्ने खालको मान्छे होइन म । धरानको मेयर टीका लगाएर होइन, १० वर्षसम्म एक्लै चप्पल पड्काएर अभियान चलाएर पाएको हो’, उनले ।

उनले यो सरकार गठनमा एक गेमर भएको अपुष्ट आरोप पनि लगाएका छन् । त्यही गेमर व्यक्तिले सम्पूर्ण क्षति र हत्याको जिम्मा लिनुपर्ने उनको भनाइ छ । गत भदौ २३ र २४ गते भएको आन्दोलनपछि मेयर हर्क प्रधानमन्त्री बन्न काठमाडौं आएका थिए । प्रधानमन्त्री बन्न नसकेपछि मन्त्री बन्नलाई शीतलनिवासमा पुगेको समाचार पनि बाहिरिएको थियो । धरान उपमहानगरकै गाडीमा काठमाडौं आएका उनी अहिले धरान फर्किएर त्यहाँ पत्रकारहरूसँग भेटघाट गरेका हुन् ।

काठमाडौं । धरान उपमहानगरपालिकाका प्रमुख (मेयर) हर्क साम्पाङले वर्तमान सरकारले आफूलाई खानेपानी र श्रम मन्त्रालयको जिम्मेवारी लिन भनेको तर आफूले अस्वीकार गरेको दाबी गरेका छन् ।

प्रधानमन्त्री नै बन्छु भनेर धरानबाट काठमाडौँ आई हल्लीखल्ली गरेका साम्पाङ यसबीच बालुवाटार पुगेर गृृहमन्त्री बनाउन माग गरेको खबर पनि बाहिएको थियो । तर उनले त्यसलाई झुट भनेका छन् । यसैबीच आफूलाई साह्रै खिसीटिउरी गरिएपछि उनले खानेपानी र श्रममन्त्री बन्न भनेको तर आफू नमानेको दाबी गरेका हुन् ।

हेर्नुस्, मेयर साम्पाङको स्टाटस

काठमाडौं । धरान उपमहानगरपालिकाका मेयर हर्क साम्पाङले मन्त्री बन्नका लागि भारतीय दूतावास धाउने नेपाली प्रवृत्तिप्रति व्यङ्ग गरेका छन् । मन्त्री बन्नु अघि दूतावास जाने चलनप्रति प्रश्न गर्दे उनले यस्तो व्यङ्ग गरेका हुन् ।

‘मन्त्री बन्नु अघि भारतीय दूतावास किन जानु पर्ने रै’छ ? यो मैले नबुझेको ! म त जान्न ! ‘जाँदिनँ’ भन्दिएँ,’ उनले सामाजिक सञ्जालमा लेखेका छन्, ‘मन्त्री बनें भने मलाई भेट्न र बधाई दिन चाहिँ आउनु पर्छ भारतीय राजदूत नमस्कार गर्दै मेरो मन्त्रालयमा ! कि कसो नेपाली हो ?’