काठमाडौं । नेपाल प्रहरीका महानिरीक्षक (आइजीपी) दीपक थापासँगै दुई अतिरिक्त महानिरीक्षक (एआइजी) को पनि बिदाइ भएको छ । आज (बुधबार) मध्यरातिदेखि दीपक थापा ३० वर्षे उमेर हदले अवकाशमा जाँदैछन् । थापा २०५२ भदौ १९ गते प्रहरी निरीक्षक पदबाट सेवामा प्रवेश गरेका थिए । थापालाई २०८१ चैत ४ सरकारले आइजीपी बनाएको थियो ।

त्यही दिन हाल एआइजी रहेका सुदिप गिरी र टेकप्रसाद तामाङ पनि प्रहरी सेवामा प्रवेश गरेका थिए । त्यसैले तीनै जना एकसाथ अवकाशमा जान लागेका हुन् । उनीहरू तीनै जनालाई प्रहरी प्रधान कार्यालय नक्सालमा एआइजी चन्द्रकुबेर खापुङले बिदाइ गरेका छन् ।

त्यसअघि आइजीपी थापालाई गृहमन्त्री रमेश लेखकले गृह मन्त्रालयमा कार्यक्रम आयोजना गरी बिदाइ गरेका थिए । केन्द्रीय अनुसन्धान ब्युरोका प्रमुख रहेका एआइजी चन्द्रकुबेर खापुङलाई सरकारले प्रहरीको ३२ औं आइजिपी बनाउने निर्णय गरिसकेको छ । उनले बिहीबारदेखि आइजिपीको कार्यभार सम्हाल्ने छन् । उनी आइजीपी बनेपछि प्रहरीमा चार वटा एआइजीको पद रिक्त हुनेछ । यसअघि भदौ १३ गते मध्यरातिदेखि एआइजी कृष्णहरि शर्मा पनि अवकाशमा गएका थिए ।