मोरङ, ११ मङ्सिरः नेपाली कांग्रेसका उपसभापति धनराज गुरुङले वर्तमान सरकारले स्वतन्त्र एवं निष्पक्ष निर्वाचनका लागि शान्तिसुरक्षा सुदृढ गर्नुपर्ने बताउनुभएको छ ।

नेपाल वित्तीय संस्था कर्मचारी सङ्घ, कृषि विकास बैंकको दुईदिने आठौँ केन्द्रीय परिषद् भेलाको आज विराटनगरमा उद्घाटन गर्दै उपसभापति गुरुङले दलहरुलाई कुनै अवरोधबिना आफ्ना गतिविधि गर्ने व्यवस्था भएमा मात्र निर्वाचन सफल एवं शान्तिपूर्ण रुपमा हुने धारणा राख्नुभयो । ट्रेड युनियन प्रजातन्त्रको खम्बा भएको चर्चा गर्दै उहाँले कर्मचारीको ठूलो आन्दोलनका कारण मुलुकमा प्रजातन्त्र पुनःस्थापना भएको धारणा राख्नुभयो ।

कृषि विकास बैंकले किसानको हितमा कार्य गर्नुपर्नेमा उपसभापति गुरुङले जोड दिँदै यसमा सरकारको सधैँ साथ र सहयोग रहने विचार राख्नुभयो । उहाँले सिंहदरबार, सर्वोच्च अदालतलगायतका मुलुकका महत्वपूर्ण भवन तोडफोड एवं आगजनी गर्ने कार्यमा जेनजीको कुनै संलग्नता नभएको भन्दै यस कार्यमा अन्य शक्ति लागेको आरोप लगाउनुभयो ।

बैंकका निमित्त कार्यकारी अधिकृत प्रताप सुवेदीले कर्मचारीको वृत्तिविकासमा बैंक सदैव सकारात्मक रहेको बताउनुभयो । नेपाली कांग्रेस मोरङका सभापति डिगबहादुर लिम्बूले निर्वाचनलाई सफल बनाउने जिम्मेवारी सरकारको रहेको विचार राख्नुभयो । नेपाल वित्तिय संस्था कर्मचारी सङ्घका अध्यक्ष रामबहादुर रावल, वरिष्ठ उपाध्यक्ष सिद्धिलाल मगिया, कर्मचारी युनियनका केन्द्रीय अध्यक्ष जानुका पौडेल, कर्मचारी सङ्घका महासचिव लेखनाथ घिमिरे, कर्मचारी सङ्गठनका अध्यक्ष इन्द्रमणि घिमिरेलगायतले कर्मचारीको वृत्तिविकास एवं करार कर्मचारीलाई सामाजिक सुरक्षा कोषमा आबद्ध गराउनुपर्नेमा सुझाव दिनुभयो ।

सो अवसरमा उपसभापति गुरुङले सङ्घद्वारा प्रकाशित स्मारिका र गीत विमोचन गर्नुभएको थियो । परिषद्को भेलामा मुलुकका ७७ जिल्लाका ९०० कर्मचारीको सहभागिता रहेको छ ।