काठमाडौं । जिल्ला अदालत काठमाडौंले टिबेटियन ओरिजनल ब्लड (टीओबी) का तेन्जिङ दावा लामालाई ५ लाख २० हजारमा रिहा गर्न आदेश दिएको छ । जिल्ला अदालत काठमाडौँका न्यायाधीश तेजबहादुर खड्काको इजलासले लामालाई मंगलबार धरौटीमा रिहा गर्न आदेश दिएको हो ।

प्रहरीको अनुसन्धानपछि जिल्ला सरकारी वकिल कार्यालयले आइतबार उनीविरुद्ध लिखत कीर्ते र लागुऔषधसम्बन्धी कसुरमा अभियोग दायर गरेको थियो । लिखत कीर्तेमा ५ लाख रुपैयाँ र लागु औषधको मुद्दामा २० हजार रुपैयाँ धरौटी माग भएको अदालतका सूचना अधिकारी दिपक श्रेष्ठले जानकारी दिए । प्रहरीले टिओबी समूहका मुख्य व्यक्ति तेन्जिङ दावालाई गत २६ असोजमा पक्राउ गरेको थियो ।