काठमाडौं। सामाजिक सञ्जालमार्फत एक महिलाको चरित्र हत्या गरेको आरोपमा प्रहरीले भक्तपुर घर भएका महेश गिरीलाई पक्राउ गरेको छ ।

गिरीलाई मंगलबार काठमाडौँको गौशालाबाट पक्राउ गरिएको साइबर ब्युरोका प्रवक्ता प्रहरी उपरीक्षक दिलीप कुमार गिरीले जानकारी दिए ।

प्रहरीका अनुसार उनले फेसबुकमार्फत एक पीडित महिलाको फोटो प्रयोग गर्दै चरित्र हत्या गरेको आरोप छ । शोभा पाठकले सामाजिक सञ्जालमै आफ्नो चरित्र हत्या गरिएको भन्दै गिरी पक्राउ परेको जानकारी दिएकी छन् ।

उनले लेखेकी छन्, ‘मेरो फोटोहरू हालेर चरित्र हत्या गर्दै हिँड्ने र धाकधम्की दिने महेश गिरीलाई प्रहरीले पक्राउ गरेको छ ।’ साथै आफूविरुद्ध हैरानी दिने अन्य व्यक्तिहरूविरुद्ध पनि उजुरी गर्ने बताएकी छन् ।

पक्राउ परेका गिरीमाथि विद्युतीय अपराध सम्बन्धी कसुरमा अनुसन्धान अघि बढाइने प्रहरीले जनाएको छ । बुधबार म्याद थप गरी अनुसन्धान प्रक्रिया अगाडि बढाइने एसपी गिरीले बताए ।