गर्भपतन मृत्यु प्रकरण: दुई चिकित्सकसहित ५ जना प्रहरीको फन्दामा
Nepal One HD ९ वैशाख २०८३ १२:०९
काठमाडौं। बुटवलस्थित इन्दु लेखा स्वास्थ्य क्लिनिकमा गर्भपतनका क्रममा एक गर्भवती महिलाको मृत्यु भएको घटनामा प्रहरीले दुई जना चिकित्सकसहित पाँच जनालाई नियन्त्रणमा लिएको छ ।
वैशाख ६ गते पाल्पाकी २९ वर्षीया गीता पाण्डेको गर्भपतनका क्रममा मृत्यु भएको थियो । सो घटनासँग सम्बन्धित बुटवलस्थित खत्री नर्सिङ होमका सञ्चालक डा. डीबी खत्री, इन्दु लेखा स्वास्थ्य क्लिनिकमा कार्यरत दुई महिला र एक पुरुष नर्सिङ स्टाफलाई अनुसन्धानका लागि पक्राउ गरिएको प्रहरीले जनाएको छ ।
इलाका प्रहरी कार्यालय बुटवलका डीएसपी निशान्त श्रीवास्तवका अनुसार तीन जनालाई नियन्त्रणमा लिइएको छ भने दुई जना चिकित्सक आफैं प्रहरीको सम्पर्कमा आएका छन् ।
मृतकका पति प्रकाश पाण्डेले आर्थिक लाभको उद्देश्यले चिकित्सकहरूले गम्भीर लापरबाही गरेको आरोप लगाउँदै डा. खत्री र रुपाखेतीसहित पाँच जनाविरुद्ध किटानी जाहेरी दिएका छन् ।
पीडित पक्षले डा. खत्रीले नै गर्भपतन गराउन इन्दु लेखा क्लिनिकमा जान सल्लाह दिएको आरोप लगाएको छ ।
घटनाबारे थप अनुसन्धान भइरहेको प्रहरीले जनाएको छ ।
